Në zyrën e Fiqret Shehut (Zgjim i kujtesës)
Nga Kopi Kyçyku
Të ngjashme mund të lexoni:
• Secili është zot në shtëpinë e vet
Në zyrën e Fiqret Shehut
Punoja në Radiotelevizionin Shqiptar.
Më dërguan në Shkollën e Lartë të Partisë, në zyrën e drejtoreshës së saj, Fiqret Shehut, e cila na foli për 8 Marsin, që atë vit përkonte me 35-vjetorin e formimit të Bashkimit të Grave të Shqipërisë (BGSH).
Normalisht duhej të intervistonim Vito Kapon, me cilësinë e presidentes së BGSH-së, por “ndryshimi i adresës” u bë me porosi nga lart, nga sektori i shtypit i KQ të PPSH.
Fiqreti, e veshur thjesht, na priti buzagaz.
Madje, si për të na i tulatur emocionet, bëri edhe një shaka në çastin kur operatorja e zërit, Mira Lyta, i vuri mikrofonin në tavolinë.
Para se të largoheshim, Fiqreti më tha se ato ditë kish parë në ekran një emision timin, që trajtonte betejat e zhvilluara në ish-Qarkun e Vlorës.
I kish pëlqyer, por më bëri vërejtje që përmendej, shumë më shpesh nga sa duhej, emri i Hysni Kapos dhe që fotografia e tij mbeti tërë kohën në ekran.
Fill pas kësaj, Fiqreti shpërtheu:
“Ato merita i ka Mehmeti, jo Hysniu”.
U trondita nga ç’po më zinin veshët.
Këto i dëgjoi edhe Mira, e cila vazhdonte të mblidhte kabllin e aparaturave.
Kthimi në televizion
Me t’u kthyer në Televizion, më thirri drejtori i Përgjithshëm i Radiotelevizionit, Çajup Rusmali, me të cilin kisha konfidencë.
Kur më pyeti si dolëm me intervistën, krahas frazave të zakonshme në kësi rastesh, e vura në dijeni për protestën e Fiqretit.
Ma vuri dorën te goja e më bëri me shenjë ta ulja zërin.
Me sa dukej kishte frikë se, midis gjithë atyre aparaturave që shërbenin kryesisht për të folur, aty në zyrë ishte edhe ndonjë që dëgjonte e regjistronte me vigjilencë fjalët tona.
Më kapi për krahu dhe dolëm në sallon.
Ndezi vrrullshëm një cigare, e thithi nja dy herë thellë dhe shtoi:
“Kopi, vëlla, ti e kupton që janë gjëra me zarar të madh.
Të mëdhenjtë aty zihen, aty pajtohen. Por ne… Prandaj: unë, ti dhe Perëndia!”
Kish plotësisht të drejtë. Ishte viti 1979.
Çajupi, që u nda nga jeta para kohe, i ndershëm e dinamik, i dashur e i shkueshëm me të gjithë, ishte rritur jetim me babën gjallë.
Ky pati mërguar qysh herët dhe qe vendosur në Kubë.
Për Lajm Shqip
Kopi Kyçyku
