Zhvlerësimi i euros/ Ja shifra e lartë që ka humbur Banka e Shqipërisë…
Në bilancin vjetor të 2017-s, Banka e Shqipërisë ka raportuar një humbje totale prej rreth 15 miliardë lekësh. E përkthyer në euro, rreth 115 milionë euro. Ndërsa një vit më parë humbja ishte rreth 4 milionë euro.
Shkak kryesor i kësaj humbjeje kaq të madhe shihet ndryshimi i kursit të këmbimit.
Euro dhe dollari janë zhvlerësuar tepër në raport me monedhën vendase.
Kjo humbje tepër e lartë ka ardhur tërësisht nga ndryshimet e kursit të këmbimit.
Si rrjedhojë e nënçmimit të ndjeshëm të euros dhe dollarit ndaj monedhës vendase, Banka e Shqipërisë ka parë një zhvlerësim të rezervave të saj që mban në këto dy monedha.
Zhvlerësimi i euros/ Ja shifra e lartë që ka humbur Banka e Shqipërisë…
Sipas shënimeve në bilanc:
“Rezerva e rivlerësimit rezulton nga fitimi/(humbja) neto nga ndryshimi në vlerën e drejtë të arit monetar dhe fitimet/(humbjet) neto nga këmbimet valutore, të cilat njihen fillimisht në fitim ose humbje dhe pastaj transferohen në rezervën e rivlerësimit. Rënia e rezervës së rivlerësimit me 15,247 milionë lekë është rezultat i zhvlerësimit të monedhave të huaja, dhe kryesisht të USD dhe Euro përkundrejt Lekut”.
Gjatë vitit 2017, euro u këmbye mesatarisht me 134.1 lekë, nga 137.4 lekë vitin e mëparshëm, me një nënçmim prej 2.4%. Edhe dollari ra nga 124 lekë në 119 lekë, duke u zhvlerësuar me 4.1%.
Banka e Shqipërisë kishte në fund të vitit 2017 gati 3 miliardë euro si rezerva valutore, të cilat janë të mjaftueshme për të financuar më shumë se 7 muaj importe.
Në krahasim me një vit më parë, rritja e rezervës valutore ka qenë 1.69%, nga 2.25% një vit më parë.
Banka e mban rezervën e saj në valutë (kryesisht euro dhe dollarë), ar dhe një pjesë në SDR (monedha e Fondit Monetar Ndërkombëtar).
Në total, për vitin 2017, Banka e Shqipërisë raportoi të ardhura nga interesat prej 2.7 miliardë lekë, nga 2.5 miliardë lekë vitin e mëparshëm. Edhe të ardhurat neto ishin me rritje, por gjithsesi rënia e fortë e valutave, që zhvlerësuan rezervat valutore, bëri që banka të rezultojë me një humbje tepër të lartë.
Klajdi Thaçi
06.04.2018
