Operacionet për zhvarrimin e eshtrave të ushtarëve grekë të rënë në luftën italo-greke të vitit 1940, do të nisin në 22 janar 2018 në fushën e Mezhgoranit.
Kjo fushë përfshihet në bashkinë e Tepelenës.
Qeveria greke vendos në dispozicion nga 75 Euro për zhvarrosjen apo dezinfektimin e eshtrave.
Kështu është vendosur në takimin e katërt të komisionit dypalëshe të ekspertëve për varrezat e të rënëve grekë në Luftën e Dytë Botërore që u zhvillua ditët e fundit në Athinë.
Burime diplomatike bënë të ditur se është rënë dakort që 10 punonjës të Bashkisë Tepelenë do të angazhohen në operacionet e gërmimeve për zhvarrosjen.
Ndërkohë që kostoja 75 Euro për zhvarrosjen apo dezinfektimin e skeleteve do të paguhet nga qeveria greke.
Pas vendimit të qeverisë shqiptare për varrezat e të rënëve grekë, palët në bisedime kanë rënë dakord për rikonfigurimin e dy varrezave të Bularatit dhe Këlcyrës.
Varrezat do të kenë statusin e varrezës historike, ndërkohë që ceremonitë përkujtimore do të zhvillohen në datën 28 tetor, me protokoll shtetëror.
Nuk do të ketë një vend tjetër prehjeje përveç këtyre dy varrezave.
Tashmë janë evidentuar 129 pika në të cilën janë varrosur ushtarët grekë, ku më e madhja është Fusha e Mezhgoranit.
Sipas të dhënave paraprake janë të varrosur rreth 1400 trupaushtarësh grekë.
Mësohet gjithashtu se kampionet e ADN-së së eshtrave të gjetura do të krahasohen me të familjarëve për të përcaktuar identitetin.
Kjo procedurë që do të aplikohet edhe për ushtarakët me numër identifikues.
Greqia llogarit se numri i ushtarëve të rënë në tokën shqiptare është nga 8000-9000.
Por, nuk pritet që të zbulohen më shumë se 3000 mbetje mortore, për faktin se gjatë këtyre viteve janë zhdukur ose dëmtuar varret.
Sipas marrëveshjes paraprake, do të vendoset mbi çdo varr një kryq ose një simbol kombëtar me përmasa të përcaktuara.
Në rastet që nuk do të ketë identifikim të eshtrave, ato do të vendosen në formatin mural pa emërtim.
Për lajm-shqip
Engjëll Serjani
