Një grua në Elbasan ka marrë djalin e saj dhe ka ikur në drejtim të paditur.
Sipas burimeve konfidenciale, por të sigurta, 46 vjeçarja, S.Ç, është larguar nga banesa bashkë me djalin e saj të vogël, M.Ç.
Mësohet se kanë ikur pa bërë zhurmë dhe duke mos lënë asnjë gjurmë.
Ende nuk dihen arsyet se përse ka ndodhur arratisja e saj nga gjiri i familjes.
Zhduken nëna me djalin. Babai kërkon ndihmën e policisë…
Denoncimi në polici, është bërë nga bashkëshorti i gruas, S. Ç, 59 vjeç.
Ai ka denoncuar në polici se i ka ikur nga shtëpia gruaja bashkë me djalin, 4 vjeç.
59 vjeçari ka shtuar se ata jetonin në harmoni të plotë dhe se nuk kishte asnjë të çarë mes tyre.
Bashkëshorti 59 vjeçar ka shprehur shqetësim më tepër për djalin e vogël.
Policia e ka pyetur nëse kishte ndonjë hamendësim ose adresë, se ku mund të kishin shkuar.
Ai ka shpjeguar se nuk dispononte asnjë adresë për vendodhjen e tyre dhe kërkonte ndihmën e policisë për gjetjen e tyre.
“ Të paktën të di që janë mirë ajo dhe fëmija im, e të pyes edhe për bashkëshorten, se përse e mori këtë vendim të papritur”, – ka shtuar ai në deponimin me shkrim.
Policisë nuk i ka mbetur gjë tjetër, veçse të shpallte në kërkim gruan.
Specialistë të uniformave blu kanë nisur përpjekjet për identifikimin e gruas.
Ndërkohë, janë lajmëruar pikat e kalimit kufitar, në mos ka kaluar në ndonjë shtet tjetër.
Megjithatë, ligjërisht, gruaja e arratisur nuk mund të kalojë fëmijën në shtet tjetër pa firmën e të atit.
Alfrida Danushi
07.02.2018
