Zëvendëskryeministri i parë i Kosovës, letër urimi Liderit të Lëvizjes Socialiste për Integrim për rezultatin e shkëlqyer në zgjedhjet e 23 qershorit
Behgjet Pacolli uron Ilir Metën: Kënaqësi për suksesin tuaj, zgjedhjet njohën standardet më të larta
Zëvendëskryeministri i parë i Kosovës, z. Behgjet Pacolli ka uruar Kryetarin e Lëvizjes Socialiste për Integrim, z. Ilir Meta për suksesin në zgjedhjet parlamentare të 23 qershorit. Në një letër urimi dërguar liderit të LSI-së pak ditë pas përfundimit të procesit zgjedhor në Shqipëri, z. Pacolli, njëkohësisht edhe kryetari i “Aleancës Kosova e Re”, shprehet se këto zgjedhje njohën standarde të reja më të larta të zhvillimit të tyre.
“Me shumë kënaqësi mësova për suksesin tuaj dhe të partisë suaj në zgjedhjet e fundit parlamentare që u mbajtën në Shqipëri, duke njohur standarde të reja më të larta të zhvillimit të tyre. Ishte një sukses që do të mbahet mend gjatë jo vetëm nga ju”, shkruhet në letrën e Zv.Kryeministrit të parë të Kosovës dërguar Kryetarit të LSI-së.
Më tej në këtë mesazh, z. Pacolli thekson se rezultati i LSI-së është mjaft inkurajues për çdo parti të re apo që nuk është pjesë e të ashtuquajturve parti të mëdha, teksa veçon nga fushata përdorimin me sukses të gjuhës ekonomike, të mbrojtjes dhe përfaqësimit të interesave të biznesit, i ideve për nxitjen e punësimit për rininë.
“Me siguri do të ketë shumë analiza rreth suksesit tuaj dhe komente rreth tyre, diçka normale për një sukses të këtyre përmasave. Rezultati juaj është mjaft inkurajues për çdo parti të re apo që nuk është pjesë e të ashtuquajturve parti të mëdha një realitet që nuk i është dhënë njëherë e përgjithmonë. Por ajo që unë dua të veçoj nga fushata juaj ishte përdorimi me sukses i gjuhës ekonomike, i mbrojtjes dhe përfaqësimit të interesave të biznesit, i ideve për nxitjen e punësimit për rininë”, vijon letra e urimit.
Gjithashtu, z. Pacolli shton se ka shumë punë e projekte që presin për jetësimin e unioni ekonomik midis vendeve tona nëpërmjet një strategjie të përbashkët kombëtare. Ai shpreh bindjen se këto zhvillime janë shërbim të qytetarëve dhe të mirëqenies së bashkëkombësve tanë.
“Ka shumë punë dhe projekte që na presin, për jetësimin e njëlloj unioni ekonomik midis vendeve tona nëpërmjet një strategjie të përbashkët kombëtare. Këto zhvillime janë shërbim të qytetarëve tanë, të mirëqenies së bashkëkombësve tanë”, thotë ndër të tjerash zv.Kryeministri i parë i Kosovës.
Në fund, z. Pacolli e mbyll letrën duke thënë se pret me padurim rastin të bashkëpunojë me Liderin e LSI-së, z. Ilir Meta në kuadër të qeverisë së Kosovës.
02.07.2013
Burimi: LSI.al