TIRANE – Në fletoren e djeshme zyrtare Këshilli i Ministrave ka publikuar dokumentacionin e plotë ku analizohen gjashtë ofertat që morën pjesë në tenderin për koncesionin “Albetrol”, si dhe motivet për të cilat në fund të procesit, fitues u shpall konsorciumi “Vetro Energy”. Përmes dokumentit Këshilli i Ministrave miraton raportin përfundimtar të Komisionit të Vlerësimit të Ofertave, pranë Ministrisë së Energjitikës “dhe shpalljen e fituesit të tenderit për privatizimin e shoqërisë “Albpetrol” sh.a. Patos”. Një pjesë e mirë e raportit të Komisionit të Vlerësimit i detyrohet analizimit të kushteve teknike të “Vetro Energy”, në fund të të cilit vërehet se të dy përbërësit kryesorë të konsorciumit përmbushin kushtet e përcaktuara nga qeveria. “Në përfundim, si investitori strategjik, ashtu dhe investitori financiar sjellin eksperiencën dhe njohuritë e nevojshme për të realizuar planin strategjik të projektit ‘Albpetrol’ dhe për të pasur një përfundim të suksesshëm. Konsorciumi zotëron një shtrirje të gjerë aktivitetesh, duke përmbushur kërkesat e tenderit”, vëren Komisioni i Vlerësimeve në raportin përfundimtar.
GARANCIA BANKARE
Në lidhje me kriterin e kërkuar për të pasur një kapital tërësisht të paguar në shumën 80 milionë euro, si dhe vlerën neto ose vlerën neto të konsoliduar të aseteve prej të paktën 100 milionë eurosh, kandidati ka paraqitur këto dokumente: Sipas raportit të auditimit të shoqërisë “Jespersen” të datës 31 dhjetor 2011, për investitorin financiar të Konsorciumit, shoqërinë “SilkRoad”, kapitali tërësisht i paguar është 178,386,753 USD (•140 milionë). Ky tregues, sipas Komisionit të Vlerësimit, e plotëson dhe e tejkalon kriterin e kërkuar të kapitalit të paguar prej 80 milionë eurosh. Sipas raportit të sipërpërmendur, rezulton që vlera neto e konsoliduar e aseteve të investitorit financiar të Konsorciumit, “SilkRoad”, më 31 dhjetor 2011 është 188,426,955 USD (• 148 milionë), duke e tejkaluar sërish kërkesën e tenderit prej 100 milionë eurosh.
AFTËSIA FINANCIARE
Për sa i përket deklaratës së aftësisë financiare, shkruan Komisioni i Vlerësimit, “kandidati ka paraqitur letrën e tij mbështetëse që certifikon aftësitë financiare, të nënshkruar nga z. Matthew Roszak në emër dhe për llogari të ‘Vetro Energy’ PTE. Ltd”. “Megjithëse në përputhje me dokumentet e tenderit, deklarata e mësipërme është e mjaftueshme, kandidati për të treguar seriozitetin e tij në paraqitjen e kësaj oferte, i ka paraqitur komisionit edhe një letër mbështetëse të lëshuar nga institucioni BNP Paribas në datën 21 shtator 2012”, shkruan komisioni në raport. Në lidhje me garancinë e ofertës së kërkuar në paragrafin 4 të kapitullit III të vendimit të Këshillit të Ministrave nr. 107, kandidati ka paraqitur një garanci bankare, lëshuar nga American Chartered Bank e Shteteve të Bashkuara të Amerikës, në datën 23 gusht 2012, në shumën prej 85,000,000 eurosh, një shumë, e cila përbën 10% të ofertës totale të paraqitur nga kandidati. Mbas kërkesës për sqarime në lidhje me garancinë e ofertës, kandidati ka deklaruar se “ka bërë që tani përparime thelbësore në sigurimin e garancisë së kontratës (e cila do të depozitohet në një nga bankat më të njohura, të vlerësuara) për këtë transaksion. “Për të vërtetuar më tej përshtatshmërinë e garancisë së ofertës, komisioni ka kryer verifikimet e tij dhe gjithashtu, i ka kërkuar konsulentit Patton Boggs kryerjen e verifikimeve përkatëse pranë Amercian Chartered Bank. Me anë të letrës së datës 25 shtator 2012, përfaqësuesi i konsulentit z. David Farber ka konfirmuar kryerjen e verifikimeve pranë kësaj banke, duke njoftuar komisionin se garancia është e vlefshme dhe e mbuluar me një kolateral të mjaftueshëm. Në këto kushte, ne vlerësojmë se garancia e ofertës është e vlefshme dhe përmbush qëllimin e saj të besueshmërisë financiare të ofertës së paraqitur nga Konsorciumi”, vazhdon raporti i Komisionit të Vlerësimit.
23.10.2012
Burimi: Balkanweb
Zbardhet raporti i plotë për tenderin e “Albetrol”
