Shpërthimi
Banesa ishte bosh, plagosen fqinjët e Mark Shkretës
Hakmarrja për vrasjen e 9-vjeçarit në Mamurras, për të cilin u arrestuan dy vëllezër dhe dyshohet se u ekzekutua babai i tyre, Mark Shkreta, ka goditur sërish me një tjetër ngjarje tragjike. Një makinë e parkuar në oborrin e familjes Shkreta, e cila ishte mbushur me tritol, është hedhur në erë, duke dëmtuar pothuajse plotësisht shtëpinë, në të cilën nuk ndodhej asnjeri, por nga shpërthimi i fuqishëm kanë mbetur të plagosur fqinjët e tyre dhe janë dëmtuar disa banesa të tjera. Policia dyshon se autorët janë nga familja Llani, të cilës iu vra i mituri gjatë një prite nga dy vëllezërit Shkreta, por edhe kjo familje është shpërngulur nga fshati, e madje, babai i 9-vjeçarit, është shpallur në kërkim që pas vrasjes së Mark Shkretës në Tiranë.
Shpërthimi tronditës
Sipas policisë, ngjarja e ndodhur pas mesnatës, rreth orës 02:00 të mëngjesit, ku për pasojë është shkatërruar pothuajse e gjithë banesa, si dhe u plagosen dy fqinjët Baftjar Musta dhe gruaja e tij, duhet të ketë lidhje me hakmarrjen që ka përfshirë dy familjet Shkreta e Llani. Për ngjarjen janë shoqëruar disa persona, të cilët janë marrë në pyetje, por ende nuk është bërë i mundur identifikimi i autorit të vendosjes së lëndës eksplozive në shtëpinë e familjes Shkreta.
Shpërthimi i djeshëm ka qenë shumë i fuqishëm, aq sa banorë të zonës bëjnë të ditur se ai është dëgjuar deri në Fushë-Krujë e Lezhë, edhe pse ngjarja ka ndodhur në Kurbin. Nga shpërthimi, sipas burimeve zyrtare të policisë, është shkatërruar plotësisht shtëpia e familjes Shkreta. Në momentin e shpërthimit, asnjë nga pjesëtarët e familjes Shkreta nuk ndodhej në banesë, pasi që nga kryerja e krimit të vrasjes së nëntëvjeçarit nga dy djemtë e Mark Shkretës, familjarët e kësaj familjeje janë larguar që aty.
Hetimet
Përveç Policisë së Lezhës dhe ekspertëve të kësaj drejtorie, në vendin e ngjarjes kanë mbërritur edhe specialistë të antiterrorit, për të hetuar mbi ngjarjen dhe për të mbledhur sa më shumë prona. Ndërkohë, përveç shkatërrimit të banesës së Mark Shkretës, nga shpërthimi janë dëmtuar edhe banesat përreth, sidomos ato të Baftjar Mustës dhe Pashk Cubit. Ekspertë të policisë bëjnë të ditur se nga dëshmitë e mbledhura rezulton se pasditen e së martës, një person ka sjellë një makinë “Mercedes Benz”, të cilën e ka parkuar para banesës së Shkretës. Dje në mëngjes, kur policia ka shkuar në vendngjarje, makina nuk ndodhej më, por vetmë disa copa të saj, të shpërndara kuturu. Në këto kushte, dyshohet se lënda plasëse, në një sasi tepër të madhe, ishte vendosur në makinë, duke sjellë shkatërrimin e plotë të saj dhe pothuajse të komplet banesës së familjes Shkreta, duke u dhënë mesazhin se aty nuk kishin vend më. Mark Shkreta, së bashku me djemtë e tij, kishin ndërtuar dy kate të shtëpisë dhe po tentonin të ngrinin të tretin, por për shkak të ngjarjeve të ndodhura mes kësaj familjeje dhe familjes Llani, puna u ndërpre në mes.
Dëshmitë e banorëve
Për ngjarjen, policia tha se janë dëmtuar disa banesa, si dhe janë plagosur dy persona. Baftjar Musta ka marrë disa plagë. Po ashtu edhe gruaja e tij, ndërkohë që Pashk Cubi ka deklaruar për mediat se shtëpia e tij ishte dëmtuar plotësisht nga shpërthimi i fuqishëm, por fatmirësisht nuk ka pasur të lënduar në njerëz. Tashmë duket se konflikti mes dy familjeve po sjell edhe pasoja të tjera, sidomos për njerëzit e zonës, ku kanë jetuar më parë, pavarësisht se të dyja familjet janë shpërngulur. Dy familjet e dëmtuara kanë rrëfyer sesi e kanë përjetuar ngjarjen e rëndë, ndërkohë që nuk dinë se kujt t’i drejtohen qoftë për të dëmtuarit në njerëz, qoftë edhe për dëmet e shumta materiale në banesat e tyre të shkaktuara nga shpërthimi, i cili ka tronditur zonën.
Konflikti mes familjeve Shkreta e Llani do të niste më 4 qershor, ku pas një debati për motive të dobëta mes djemve të këtyre dy familjeve do të kalohej në konflikt dhe përdorim të forcës. Kjo ngjarje do të pasonte pritën që vëllezërit Altin dhe Vladimir Shkreta do t’i bënin automjetit ku udhëtonte Muharrem Llani së bashku me kunatën dhe nipin e tij. Breshëritë e automatikut në drejtim të mjetit “Volsvagen”, ku udhëtonte familja Llani, do të linte të vdekur një fëmijë 9-vjeçar, ndërsa do të plagosej rëndë vetë drejtuesi i mjetit. Babai i fëmijës së vrarë u betua për hakmarrje në ditën e ceremonisë së varrimit. Nga frika e hakmarrjes familja Shkreta u shpërngul nga fshati Shpërllet, ndërsa policia arrestoi dy djemtë e tyre, Altin dhe Vladimir Shkretën, si autorë të atentatit ndaj familjes Llani. Pak ditë më vonë, teksa fshihej në Tiranë, u ekzekutua babai i dy të arrestuarve, 71-vjeçari Mark Shkreta. Për këtë, policia shpalli në kërkim Jetmir Llanin, por ky i fundit deklaroi në media se ishte në Greqi, ku kishte dërguar vëllain për kurim. Megjithatë, policia tha se ai mbetet i dyshuari kryesor, pasi ka prova të forta se Llani është parë në Tiranë para vrasjes së Shkretës.
Nisma
Avokati i Popullit: Task-Forcë për gjakmarrjen
Avokati i Popullit urdhëron ngritjen e një Task-Force që do të hetojë punën e Policisë së Shtetit për të gjitha dosjet e gjakmarrjes në vend. Ngjarjet e fundit, ku janë ekzekutuar disa persona për shkak të gjakmarrjes, janë shkaku që Avokati i Popullit, Igli Totozani, vendosi ngritjen e kësaj strukture për monitorimin e veprimtarisë së policisë. Kjo Task-Forcë që do të shqyrtojë në vijimësi fenomenin e gjakmarrjes në Veri të vendit, synon monitorimin e veprimtarisë të Policisë së Shtetit dhe strukturave të tjera shtetërore përgjegjëse, në funksion të përmbushjes së detyrimeve të tyre ligjore dhe institucionale për fenomenin e gjakmarrjes. Gjithashtu, kërkohet që të ketë shkëmbim të informacioneve me organizatat e shoqërisë civile që merren me fenomenin e gjakmarrjes, lidhur me problematikat në terren dhe referimin e këtyre rasteve pranë Avokatit të Popullit. Grupi i punës do të shqyrtojë rast pas rasti në vazhdimësi monitorimin e çështjeve që kanë lidhje me fenomenin e gjakmarrjes, si dhe zbatueshmërinë e ligjit Nr. 9389, datë 04.05.2005 “Për krijimin dhe funksionimin e Këshillit Koordinues në luftën kundër gjakmarrjes”.
02.08.2012
Burimi: Gazeta Shqip
