Qytetari pajiset me targë pranë DPSHTRR prej pranisë së medias
Një qytetar kishte aplikuar prej javësh pranë Drejtorisë së Përgjithshme të Shërbimeve të Transportit Rrugor për të marrë targën e motorrit.
Duke qenë se ai e pa të pamundur zgjidhjen e kësaj situate personalisht, njoftoi redaksinë Lajm-Shqip për të zgjidhur këtë problematikë.
Qytetari pretendonte se pranë këtyre zyrave nuk respektohej rradha e aplikantëve.
Atyre nuk i jepet numri i tyre real në rradhë, por numra më të mëdhenj. Nëse një aplikant është i 20-ti, atij mund t’i jepet numri 100.
Problemi tjetër që e shqetësonte këtë qytetar lidhet me mosdhënien e targës.
Ai kishte shkuar disa herë pranë DPSHTRR dhe gjithmonë i ishte komunikuar se për momentin nuk ka patur targa për motorrë.
Gjithashtu i ishte caktuar një afat kohor në të cilin ai mund të shkonte dhe të merrte targën.
Qytetari ishte paraqitur brenda afatit dhe sërish i ishte dhënë e njëjta përgjigje.
Qytetari pajiset me targë pranë DPSHTRR prej pranisë së medias
Lajm-Shqip u nis sot për të ndjekur nga afër këtë problematikë.
Situata dukej edhe më e rënduar seç e kishte përshkruar qytetari.
Duke qenë se u pa prania e medias pranë ambjenteve të DPSHTRR, qytetari u lejua të futej brenda pa rradhë.
Atij iu dha targa në mënyrë të menjëhershme.
Gjithashtu iu tha se kishte patur targa për motorrë edhe për gjashtë muajt në vazhdim.
Ndërkohë qytetarëve të tjerë të cilët ishin të shumtë duke pritur në rradhë, ditën e sotme nuk i jepeshin as numra.
Të revoltuar ata shtyheshin pranë derës dhe kërkonin numra që të mund të futeshin brenda.
Të shumtë ishin aplikantët të cilët vinin nga rrethe të largëta për të disatën herë dhe që qëndronin të revoltuar e pashpresë se do të pajisesishin edhe këtë herë me një targë.
Problemi pranë kësaj Drejtorie do të mbetet edhe për disa kohë aktual pasi ditën e djeshme ka nisur rikonstruktimi i ndërtesës ku shpërndaheshin numrat.
Ndërkohë që një qytetari iu zgjidh problemi i tij për shkak të pranisë së medias, të tjerë mbetën prapa dyerve me shpresën se ditën e sotme do të mbaronin punë.
Për lajm-shqip:
Jorida Fataj
Klajdi Thaçi
03.04.2018
