Mafiozi më i tmerrshëm i shekullit të XX, Totto Riina ka ndërruar jetë në mëngjes në moshën 87 vjeçare. Kreu i famëkeqes, “Cosa Nostra”, i cili në vitet 80 të shekullit të shkuar, i shpalli luftë shtetit Italian. Nga banda e tij, u vranë me atentate terroriste mbi 30 zyrtarë të shtetit, por edhe qindra persona të tjerë, rivalë dhe familjarë të tyre. Ai ka ndërrruar jetë në Spitalin e Parmës.
Totto Riina u rrit në fshatin Corleone të Siçilisë, ngjitur me fshatin arbëresh të Piana degli Albanesi.
Lindi më 16 nëntor të vitit 1930 nga një familje e varfër bujqish. Por u kthye në personin më të frikshëm të Gadishullit Apenin. Riina ishte dënuar me 26 dënime të përjetshme. Qe autor dhe urdhërdhënës i vrasjes së kreut të skuadrës së lëvizshme të policisë së Palermos, Boris Giuliani, prefektit të Siçilisë, gjeneralit Carlo Alberti della Chiesa, prokurorit të parë antimafia, Nino di Matteo, Giovani Falcones dhe Paolo Borselinos.
Vetëm tre vjet më parë, edhe pse i kalbur në burg, kreu i pashkarkuar i Casa Nostra-s, për efekt të fuqisë së tij, fliste nga qelia i lumtur për krimet që kishte bërë. Tregonte se nuk ishte pjesë e një mekanizmi brenda shtetit, por kreu i plotfuqishëm i një organizate të tmerrshme. Sipas përgjimeve, që i janë bërë në qeli, gjatë bisedës me kreun e mafias së Puglia-s, Alberto Lorusso, Riina tha se “Falconen e vdiqa si një peshk ton”. –“Unë jam bërë një gjë shumë i fortë, një mbret i vërtetë, historia do të shkruajë për mua, se isha një person shumë i rëndësishëm”, i përshpërsite në vesh Lorusso.
Duke folur për paktin e famshëm me shtetit Italian, për të ndaluar stinën e vrasjeve dhe të terrorit në Siçili, kreu i Casa Nostra-s tha vetëm pak vite më parë se “ishte shteti që kërkoi të bënte pakt me mafia-n dhe jo kjo e fundit”. Pikërisht kjo mënyrë e Riina-s për të rrëfyer hapur krimet e tij, bindi prokurorët që të vendosin përgjues edhe në qeli. Kjo, për të mbledhur mendimet e fundme të bossit në fuqi të Cosa Nostra-s, për të gjetur ushtarët e rinj të saj.
Riina konfirmoi atë që Giovani Falcone ka dhënë gjithmonë:
–“Cosa Nostra nuk merr kurrë urdhëra nga forca jashtë saj”. Por dikush brenda kësaj mafia të frikshme kishte marrëdhënie me shtetin, politikën, shoqërinë civile, marrëdhënie që ishin misterioze dhe të padukshme. Këtë e ka thënë edhe Totto Riina në rrëfimet e tij për shokun mafioz. Fliste me krenari për vrasjen e gjeneralit della Chiessa.
Kur e dëgjova në televizion se ishte emëruar si prefekt i Palermos për të rrëzuar mafian më iku truri. T’i bëjmë një mirëseardhje të mirë u thashë çunave, por të vendosim veglat në rregull.
Por Riina kundërshtoi zhdukjen e kasafortës së gjeneralit della Chiesa pas vrasjes. Sipas kreut mafioz u krye nga grupe brenda pushtetit. –“Nuk merresha me këto gjëra, unë kam mbetur një njeri i ndershëm”. Të njëjtën gjë ka deklaruar edhe për Paolo Borselinon, ku nga burgu tregoi, se ishin shërbimet sekrete që morën nga shtëpia e gjykatësit, pas vrasjes, bllokun e kuq ku ruheshin sekretet e Borselinos.
Gjatë marrjes në pyetje nga prokurorët antimafia, për kontaktet me shërbimin sekret u përgjigj: –“Nëse do të isha takuar me ta, nuk do të quhesha Salvatore Riina”.
Ai nuk u pendua kurrë për krimet, që bëri. Madje theksonte, se do të duhej të kishte kryer më shumë. –“Duheshin vrarë të gjithë, e vetmja mënyrë e qeverisjes sonë ishte një diktaturë e egër kundër kësaj drejtësie”.
Aktualisht shumë sekrete të Riinës ruhen nga një prej të besuarve të tij, i arratisur që nga viti 1993, Matteo Messina Denaro. Ai është kthyer në një fantazmë tashmë. Ai u rrit në grupin mafioz gjatë sezonit të vrasjeve dhe akteve terroriste.
Për Lajm-Shqip
Ylli PATA
