Kjo është ura e Zëmblakut, e cila nga fillimi i muajti dhjetor ka dalë jashtë funksionit, për shkak të dëmtimit të rëndë që kanë pësuar këmbët e kësaj ure si pasojë e prurjeve të shumta të lumit të Devollit.
Korçë/ Ura e Zëmblakut e dalë jashtë funksionit. Prefekti i qarkut ka siguruar banorët se situata do të zgjidhet.
Dalja jashtë funksionit e urës ka sjellë vështirësi në qarkullim të më shumë se 10 mijë banorëve të Bashkisë Pustec dhe atyre të fushës së Maliqit.
Banorët janë të shqetësuar pasi e kanë të pamundur të kryejnë në kohë punët e stinëve në frutikulturë, në veçanti në plantacionet e mollëve.
Gjithnjë sipas tyre në mungesë të urës janë të detyruar të marrin mjete me qera nga fshatra të tjerë pasi e kanë të pamundur kalimin me mjetet e tyre në plantacionet e mollëve.
Prefekti i qarkut të Korçës, Dhori Spirollari ka siguruar banorët dhe jo vetëm se shumë shpejt nga forcat e sigurisë së Kosovës do të vendoset një urë bel e cila do të sherbejë provizorisht për kalimin normal në këtë zonë por edhe për të gjithë ata që kanë destinacion pikën e kalimit kufitar të Goricës.
Që nga dëmtimi i urës, kalimi i banorëve kryehet nga ura e Pojanit e cila duke mos patur kapacitetin e duhur mbajtës i ka detyruar mjetet e tonazhit të rëndë të gjejnë një rrugë tjetër alternative shumë herë më të gjatë.
Ledjona Xheladinaj
01.02.2018
