Ministria e Arsimit vendos datat për regjistrimet e kandidatëve vijues
Universiteti i Tiranës ka shpallur dje zyrtarisht rreth 500 vende bosh. Të gjitha këto janë kuota të paplotësuara në fakultetet e UT-së, si dhe në filialet e universitetit më të madh të vendit në rrethe. Numrin më të madh të kuotave të paplotësuara e ka Fakulteti i Gjuhëve të Huaja me 94 kuota dhe Fakulteti i Shkencave të Natyrës, me 92 kuota të paplotësuara. Në filialet e Universitetit të Tiranës rezulton të jenë plot 80 kuota të paplotësuara. Të drejta studimi të paplotësuara me shumicë gjejmë edhe në Fakultetin e Ekonomikut.
Në degët histori dhe filologji kanë mbetur pa u plotësuar 18 të drejta studimi, në Fakultetin e Shkencave Sociale janë bosh 44 kuota dhe në degën infermierisë janë të parealizuara 41 të drejta studimi.
Në degët e preferuara drejtësi apo mjekësi, sipas Universitetit të Tiranës, ka sërish vende bosh, për të cilat kandidatët për studentë dhe familjarët e tyre po presin me padurim çeljen e regjistrimeve për fazën vijuese të renditjes së fituesve.
Kështu, në degën e mjekësisë ka 21 vende të lira kurse në degën e drejtësisë rezulton të ketë 33 vende bosh.
Fakulteti Ekonomik ka 63 vende vakante. Më shumë vende bosh rezulton të ketë dega financë dhe biznes, me 22 kuota dhe më pas vjen dega ekonomiks me 10 kuota dhe dega e informatikës ekonomike me 9 kuota.
Të gjitha universitet e vendit kanë përgatitur relacionin e vendeve vakante për ta dërguar në Ministrinë e Arsimit dhe të Shkencës. Më pas, dikasteri firmos edhe udhëzimin për çeljen e fazës vijuese të regjistrimeve, duke orientuar kandidatët e tjerë që kanë marrë më pak pikë se fituesit e parë, por që nuk qëndrojnë tepër larg me arritjet dhe vlerësimet e paraardhësve.
Rishpërndarja e vendeve vakante në faza të tjera të regjistrimit është proces i miratuar me vendim të Këshillit të Ministrave, që në fillim të aprovimit të kuotave, ndarjeve të kategorive, tarifave shkollore dhe përjashtimeve për disa nëngrupe të veçanta.
Sakaq, universitetet e tjera të vendit janë në fazën e përpunimit të të dhënave dhe pritet që ditët e ardhshme pas mbledhjes së kuotave bosh në të gjitha institucionet e arsimit të lartë Ministria e Arsimit dhe e Shkencës të japë edhe numrin total të të gjitha vendeve të lira nga faza e mëparshme e regjistrimit.
Këtë vit, regjistrimi i kandidatëve fitues është bërë on line nëpërmjet një sistemi të dhënash të informatizuara. Për rastet e gabimeve dhe paqartësive në hedhjen e detajeve personale, studentët e shpallur fitues janë paraqitur për të bërë regjistrimin manual pranë sekretarive të fakulteteve në vend.
Tabelë
Kuotat bosh
Histori-Filologji 18 kuota
Shkencat e Natyrës 92 kuota
Gjuhët e Huaja 94 kuota
Shkencat Sociale 44 kuota
Mjekësi 21 kuota
Infermieri 41 kuota
Drejtësi 33 kuota
Filialet e UT-së 80 kuota
Fakulteti Ekonomik
Informatikë ekonomike 9 kuota
Ekonomiks 10 kuota
Biznes 22 kuota
Financë 22 kuta
Total 63 kuota
Formulari A3
Përjashtohen degët “elitare”
Në garë, 4100 kandidatë. Dokumenti zbardhet këtë javë
Pas përfundimit të procesit të regjistrimeve për fazën e dytë të fituesve, të rinjtë që nuk e kanë gjetur kodin e identifikimit në asnjë prej listave do të kenë në duar formularin A3, shansi i fundit që do t’u jepet për të qenë student në një prej fakulteteve të vendit. Në formularin A3 do të listohen vetëm ato degë të cilat kanë numër të konsiderueshëm të vendeve vakante, për shkak se nuk kanë qenë shumë të kërkuara nga maturantët.
Duke iu referuar të dhënave zyrtare që publikon Agjencia Kombëtare e Provimeve, numri i vendeve të lira arrin në 4100 në të gjitha fakultetet e vendit, kuota që do të realizohen pas plotësimit të formularit A3. E megjithatë, aktualisht nuk dihen ende se cilat do të jenë degët, mbi bazën e të cilave do të hartohet ky dokument, ndërsa pritet që formalitetet e nevojshme të shpallen në ditët në vijim. “Për të gjithë studentët të cilët nuk janë pjesë e listës përfundimtare të fituesve do të ketë një fazë të dytë me formularin A3, i cili do të bëhet publik këto ditë. Me publikimin e tij do të zbardhen edhe procedurat e plotësimit, që do të bëhen online, njësoj si formulari i preferencave”, tha Edlira Late, drejtoresha e Arsimit të Lartë Publik e Privat, në Ministrinë e Arsimit. Sipas të dhënave të deritanishme, mësohet se degët që janë listuar në formularin A3,
janë ato ku kërkesat e kandidatëve kanë qenë më të pakta krahasuar me degët elitare, si mjekësi, stomatologji, farmaci apo drejtësi.
Specialistët e arsimit bëjnë me dije se Universiteti i Tiranës renditet i pari për numrin e lartë të regjistrimeve, ndërsa numri më i ulët regjistrohet në Universitetin e Gjirokastrës.
17.10.2012
Burimi: Gazeta Shqip
