Uji i pijshëm penalizon 200 abonentë debitorë në Libohovë
Faturat e prapambetura dhe vendosja e matësave të ujit.
Këto do të jenë operacionet e ndërmara nga Drejtoria e Ujsjellësit në Bashkinë e Libohovës. “Reforma e ujit” e paralajmëruar nga qeveria qëndrore, ka vënë në lëvizje strukturat vendore përkatësisht Drejtorinë e Ujësjellësit në bashkinë Libohovë. Burime të kësaj drejtorie bëjnë të ditur se aksioni për arkëtimin e faturave të prapambetura është në proces për debitorët familjarë dhe bizneset private.
Në listat e debitorëve përfshihen rreth 200 abonentë.
Kryesisht familjarë, por ka edhe biznese që nuk kanë shlyer detyrimet për konsumin e ujit. Sipas këtij burimi në të gjitha rastet, kur abonentët debitorë kanë refuzuar të shlyejnë detyrimet, menjëherë është bërë ndërprerja e linjës që furnizon abonentin debitor. Ndërkohë që me disa nga debitorët që pranojnë detyrimin dhe shlyerjen janë lidhur akt-marrëveshje për të shlyer me këste brenda një periudhe të caktuar kohore. Mbledhja e detyrimeve të prapambetura është si fazë e parë e operacioneve. Kjo fazë do të pasohet më tej me vendosjen e matësave të ujit dhe gjithashtu rritje të çmimit. Deri në fund të këtij viti do të vendosen matësat e ujit në institucione dhe biznese.
Më pas në muajt e ardhshëm do të pajisen me matësa të gjithë abonentët. Rritja e çmimit të ujit ka për qëllim rritjen e të ardhurat të entit të menaxhimit të ujit. Deri tani ky ent publik nuk është rentable për shkak të kostos së lartë dhe të borxheve që ka ky ent ndaj të tretëve, kryesisht OSHE-së. Pjesë e operacioneve të ndërmarrë së fundi është edhe prerja e lidhjeve të dyfishta apo të paligjshme.
Për Lajm Shqip
Engjëll Serjani
