Totozani: Grup pune për të hetuar ndërtimin e xhamisë.
Ankesat – Ne si institucion funksionojmë në bazë të ankesave të qytetarëve. Duke qenë se këtë e konsiderojmë ankesë do ta shqyrtojmë më tej
Deklarata – Ne jemi 1 institucion që mbrojmë të drejtat e njeriut, ambientin dhe të drejtën e çdo individi për të pasur liri fetare
Alarmi – Ambientalistët kërkojnë që të mos lejohet ndërtimi i ambasadës në kopshtin zoologjik, ngjarje për të cilën po diskutohet aktualisht
Negociatat për ndërtimin e Xhamisë së Namazgjasë, në Rrugën e Elbasanit përballë Komunitetit Mysliman kanë nisur prej disa muajsh. Por, ndërsa pritet zbardhja e lejes së ndërtimit, gropa ku do të ndërtohet xhamia, në krah të Kuvendit, është bërë gati tashmë për të nisur punimet. Mirëpo, kjo ngjarje nuk ka mbetur jashtë vëmendjes së ambientalistëve, të cilët të tronditur nga betonizimi që i është bërë kryeqytetit, duke i mohuar çdo tokë të gjelbër, kërkojnë që xhamia të mos ndërtohet në rrugën e Elbasanit. Kjo, pasi sipas tyre është e vetmja zonë jeshile që i ka rezistuar betonit. Në një situatë të tillë, ambientalistët dhe organizatat e shoqërisë civile, përveç deklaratave publike kanë dorëzuar ankesa me shkrim në zyrën e Avokatit të Popullit, i cili ka zhvilluar dje një takim me përfaqësues të tyre.
Totozani tha se institucioni që ai drejton mbron qytetarët nga veprimet e paligjshme dhe të parregullta të administratës, por edhe promovon. Ai u siguroi besimtarëve se do të mbështesë ngritjen e një xhamie, që qytetarët myslimanë të mos ndihen të diskriminuar, por ashtu si çdo besimtar tjetër të kenë dhe ata kultin e tyre të faljes.
“Ne jemi një institucion që mbrojmë të drejtat e njeriut, mbrojmë ambientin, por mbrojmë të drejtën e çdo individi për të pasur liri fetare. Nuk e kam toleruar kurrë faktin, që besimtarët myslimanë nuk kanë mundur dot të kryejnë ritet e tyre në një ambient dinjitoz. Në këtë klimë, Avokati i Popullit mbështet të drejtën e çdo besimtari për të pasur një objekt kulti. Por, ambientalisti Sazan Guri ka një sërë vërejtjesh që lidhen me mbrojtjen e mjedisit dhe me procedurat që janë ndjekur për përcaktimin e vendit të ndërtimit. Ne si institucion funksionojmë në bazë të ankesave të qytetarëve, ne këtë e konsiderojmë një ankesë dhe për këtë qëllim do caktojmë një grup ekspertësh që do ndjekin çështjen dhe do të shqyrtojnë gjithë ankesat e paraqitura sot nga organizatat e Shoqërisë Civile”, shpjegoi Avokati i Popullit.
Nga ana tjetër, ambientalistët, por edhe përfaqësues të shoqërisë civile argumentuan arsyet pse ndërtimi i Xhamisë së Namazgjasë, por edhe i 2 kullave që përflitet se do të ngrihen përkrah saj duhet të ndalohen rreptësisht.
“Kjo xhami bashkë me kullat të ndërtohet në zonën “green show”, në Paskuqan, ndërsa në Tiranë nuk duhet të ndërtohet më. Ai që bën një gabim, bën edhe të dytin, të tretin…! Sipërfaqja e zënies së truallit është 100 për qind. Kështu, që të ngrihet xhamia dhe 2 kullat, gardhi e kalon edhe trotuarin. Ne kemi protestuar për këtë. Ndërtimi që do bëhet është pa projekt. Kjo është vepra e parë penale që po bëhet, pasi kush më garanton se veprat e tjera do të ndërtohen me planimetri!! Në Tiranë nuk duhet të ndërtohet asnjë m3. Nëse do ndërtosh shko në Paskuqan, në zonën green show, siç e quan Britania”, theksoi Guri.
Por, zona ku është parashikuar ndërtimi i Xhamisë së Namazgjasë, nuk është e vetmja pakënaqësi e ambientalistëve. Ata vunë në dijeni Avokatin e Popullit edhe për ambasadën që do të ndërtohet pas pak kohësh te kopshti zoologjik. Lidhur me këtë çështje Totozani tha: “Parqet, lumenjtë janë ndrydhur nën kthetrat e ligjshme e herë të paligjshme. Ne jemi institucioni, që mbrojmë të drejtat e njeriut”.
26.07.2013
Burimi: Gazeta Shqip
