Topi: Shkodra s’mund të votojë për ata që mbledhin vota për Kaçin e zi
SHKODER – Kreu i Frymës së Re Demokratike, Bamir Topi zhvilloi sot një takim elektoral në Bushat, Velipojë dhe Postribë. Topi tha se FRD do të marrë një mandat në qarkun e Shkodrës pasi Partia Demokratike ka tradhtuar kauzën e saj.
“Për qytetarët shkodranë 23 qershori është moment për ti thënë Ik politikanëve që e lanë Shkodren dhe Shqipërinë jasht Europës, atyre që braktisën të përndjekurit dhe mbledhin vota për Kaçin e zi, atyre që tradhëtuan kauzën e demokratëve”, u shpreh kreu i FRD-së.
Programi i FRD-së nënvizoi Topi është i guximshëm, ai ka përparësi kompensimin përfundimtar të të përndjekurve, sepse ky akt, është çështje dinjiteti dhe respekti për shtresën e vuajtur në diktaturë. Shkodra theksoi ai, ka personalitete dhe vlera njerëzore te çmuara dhe është e padrejtë të identifikohet me emrin e Kryetares së Kuvendit.
Një tjetër argument që preku Topi ishte dhe çështja e përmbytjeve të çdo viti në zona të ndryshme të qarkut. “Si ka mundësi që përmbytet Shkodra, nën Shkodra dhe Velipoja dhe mungojnë reagimet nga njerëzit.. Sigurisht që kanë frikë, por unë ju them se mënyra më e mirë për të reaguar ndaj indiferencës së qeverisë është vota. Fanatizmi që ngrenë 2 gishtat lart kur janë 3 metra nën ujë , është e keqja e njerëzve të thjeshtë”, u shpreh ai.
“Parlamenti shqiptar duhet të kishte performancën e një Parlamenti dinjitoz, nuk e ka ofruar, Parlamenti është zhvendosur nën thundrën e ekzekutivit. Ai është kthyer në një institucion ku deputet shkojnë vetëm për të marrë rrogën dhe nuk janë influence për zgjidhje te mëtejshme, meraku më i madh nuk është për Parlamentin që iku pasi në të shumtën e kohës ai ka funksionuar me gjysmën legjislative, por për të ardhmen”, theksoi Topi.
19.06.2013
Burimi: Shekulli.com
