Thaçi, njeriu i luftës dhe paqes- Ai drejtoi UÇK-në në luftën e përgjakshme prej maleve të një vendi të varfër dhe shkëmbor, ishte shumë i aftë për t’i shpëtuar armikut aq sa shokët e betejës e thërrisnin “Gjarpri”. Hashim Thaçi, kryeministri 45-vjeçar i Kosovës kërkon të kujtohet si “një burrë shteti”.
Kështu shkruan gazeta prestigjoze amerikane “New York Times”. Në muajin qershor ai ra dakort të arrinte një marrëveshje të rëndësishme me Serbinë, që u vlerësua në Europë dhe në Shtetet e Bashkuara si një triumf i paqes dhe pajtimit pas luftrave të viteve 1990 në Ballkan, ku humbën jetën 120 mijë persona, mbi 10 mijë prej të cilëve ishin në Kosovë.
“Thaçi vlerësohet në Uashington dhe Bruksel si Gerri Adams i Ballkanit. Vendi i tij është në rrugën drejt Europës, emri i tij është përmendur, megjithëse me pak gjasa, për të qenë kandidati i mundshëm për çmimin Nobël për Paqen”, shkruan “NYT”.
Prestigjozja amerikane i referohet momenteve më të rëndësishme të jetës së Thaçit si: Fëmijëria. ai ishte i shtati nga nëntë fëmijët e familjes së fermerëve nga Drenica, zemra e qëndresës shqiptare kundër serbëve; politizimit në vitet e adoleshencës; dhe bashkimit me UÇK-në.
Hashim Thaçi, shkruan “NYT”, ndryshe nga Rugova që favorizonte një qëndresë pasive gandiane, ishte avokat i luftës së armatosur. Madje, atij i kreditohet transformimi i UÇK-së, nga një njësi e ndarë dhe e përçarë në një makinë luftarake të unifikuar.
Në vitin 1999, shkruan prestigjozja amerikane, Thaçi i bëri shumë përshtypje sekretares amerikane të Shtetit. Ai u shfaq pragmatist për të nënshkruar një marrëveshje në Rambuje, megjithëse bisedimet dështuan sepse Beogradi refuzoi të tërhiqte trupat ushtarake, çka çoi në ndërhyrjen e NATO-s.
“E shkuara po i shfaqet. Në vitin 2010 – shkruan gazeta amerikane – raporti i Këshillit të Europës e akuzon Thaçin se ka drejtuar një grup të ngjashëm me mafian që trafikonte armë, heroinë dhe organe gjatë luftës dhe pas saj. Në gusht të 2011-ës, Bashkimi Europian ngriti një task forcë për të hetuar akuzat, por ende nuk janë bërë publike zbulimet e saj”.
I pyetur për këto akuza dhe për ekzistencën e “shtëpisë së verdhë” në Shqipëri, Thaçi shpjegon: “Është diçka që kurrë s’ka ndodhur, s’kemi çfarë të fshehim. Sa më shpejt të qartësohet, aq më mirë do të jetë për Kosovën. Është një peshë vertetë shumë e rëndë për ne dhe besojme tek e verteta dhe drejtesia”.
Eskperienca e luftës, siç thotë ai për “NYT”, e kish mësuar të ruante durimin edhe gjatë gjashtë muajve me 12 orë bisedime në ditë përballë kryeministrit Ivica Daçiç, i cili në kohë lufte kishte qenë zëdhënës i Sbllobodan Millosheviç, forcat e të cilit ishin përpjekur, megjithëse pa sukses, për të gjurmuar, zbuluar dhe vrarë Thaçin. “Nuk ishte e lehtë ulja përballë në një tryezë e dy armiqve të përbetuar. Por pragmatizmi fitoi”, shpjegon ai.
Megjithëse ai është vlerësuar si bariu drejt pavarësisë së Kosovës, apo nga zv/presidenti amerikan Joseph Biden si George Washington-i i Kosovës, qeveria e tij është përballur me akuza për korrupsion.
Në muajin maj ai pësoi një goditje tjetër, kur gjykata e BE-së urdhëroi arrestimin e shtatë ish-komandantëve të UÇK-së, të akuzuar për krime lufte, përfshirë edhe dy ish-këshilltarët e tij të ngushtë.
Ai thotë se bashkë me shokët kishin qenë luftëtarë të lirisë. Ai citon një këngë të preferuar të Sting, që e dëgjonte në kohën kur ishte komandant i UÇK, vargjet e të cilës thonë:
“Duhet më shumë se uniforma për të krijuar një burrë, është më shumë se liçensa për armën. Perballuni me armiqtë, shmangini kur mundeni. Një zotëri do të ecë, nuk do t’ia mbathë kurrë”.
14.07.2013
Burimi: Top Channel