Presidenti i Republikës së Kosovës, Hashim Thaçi falënderoi liderët dhe qytetarët e Luginës së Preshevës, për “arritjen e qëllimit të përbashkët të bashkimit të Preshevës, Bujanovcit dhe Medvegjës me Kosovën”.
Thaçi këmbëngul: Lugina e Preshevës duhet të bashkohet me Kosovën
Përmes një postimi në Facebook, Thaçi edhe një herë këmbëngul se bashkimi i këtyre territoreve me Kosovën, që gjenden në jug të Serbisë, do të mund të arrihet përmes korrigjimit të kufirit mes këtyre dy shteteve.
“Kjo e drejtë duhet të na bashkojë pa dallime partiake, ideologjike dhe bindjesh tjera. Qoftë nga pozita institucionale, e shoqërisë civile apo e opozitës”, shkruan presidenti Thaçi.
Presidenti Thaçi po kërkon që në kuadër të dialogut me Serbinë, që ndërmjetësohet nga Bashkimi Evropian, të flitet edhe për korrigjimin e kufijve dhe mundësisë së bashkimit të Luginës së Preshevës me Kosovën.
Deklarata e Thaçit mund të shihet edhe si sfidim i paralajmërimit më herët sot, nga Kancelarja e Gjermanisë, Angela Merkel, e cila shfrytëzoi një takim sot me kryeministrin e Bosnje-Hercegovinës, që të japë një mesash të prerë ndaj zërave për ndryshim kufijsh në gadishullin ballkanik.
Kancelarja Merkel tha se ka tendenca të caktuara në Ballkanin Perëndimor dhe se po flitet për rivendosje të kufijve. Gjë e cila, sipas mendimit të saj nuk mund të bëhet.
