Policia australiane arrestoi një person, nën dyshimet se ka planifikuar sulm terrorist gjatë festimeve për Vitin e Ri në Melburn.
20 vjeçari nga Melburn akuzohet për vepra terroriste.
Autoritetet thanë se veprat bartin dënimin maksimal, atë me burgim të përjetshëm.
Policia dyshon se ai ka planifikuar të qëllojë njerëz me armë automatike në Sheshin e Federatës, në qendër të qytetit.
Zëvendëskomisionari i policisë, Shane Patton, tha se i dyshuari ka lindur në Australi. Autori ka prindër somalezë, dhe ka qenë nën vëzhgim të policisë që prej muajit janar.
Ai ka siguruar online një manual të Al Kaedës, me udhëzime për kryerjen e një sulmi terrorist. Ai ka qenë simpatizues i grupit militant të Shteti Islamik, tha policia.
Autoritetet po ashtu thanë se nuk ka kërcënim të vazhdueshëm për publikun.
Vitin e kaluar, rreth 500,000 njerëz kanë festuar Vitin e Ri në qendër të Mellburnit.