Skandali i rradhës, HEC-i prish ujësjellesin në Peshkopi, ja sa miliona lekë ka kushtuar
Emisioni Fiks Fare denoncoi shkatërrimin e ujësjellësit të njësisë Administrative Zall Dardhë në Peshkopi, nga një firmë që po ndërton HEC-e. Ujësjellësi 10-vjeçar kishte kushtuar plot 118 milionë lekë. Banorët ankohen se firma që po ndërton HEC-et Lashkiza 1 dhe Lashkiza 2 , e ka shkatërruar dhe e ka nxjerrë jashtë funksionit.
Firma ka dëmtuar rrjetin e ujësjellësit në pjesën më të madhe të tij. Ndërkohë që një pjesë e zonës ku janë shtrirë tubat e HEC-it dhe ujësjellësit ka shkarë si pasojë e e punimeve në zonë.
Zall Dardha e harruar…
Banorët e Njësisë Administrative ankohen për rrugën e shkatërruar, shkollën e prishur si dhe dëmtimin e ujësjellësit nga firma që po ndërton HEC-e.
“Ne jemi rreth 1200 banorë, kjo është njësi administrative. Rruga që të sjell në këtë njësi është e shkatërruar. Shteti nuk ka vënë asnjë dorë. Firma që po bën HEC-in e ka prishur ujësjellësin. Kemi disa muaj pa ujë të pijshëm. Kërkojmë vetëm që të kemi ujë, por deri më tani nuk kemi marrë zgjidhje” thonë ata. Ndërsa shtojnë se kanë shkuar pranë të gjitha institucioneve, por nuk kanë marrë zgjidhje.
Gazetarët e Fiks Fare shkojnë në vendgrumbullimin e ujësjellësit dhe të HEC-eve për të verifikuar pretendimin e banorëve. Zona kishte rrëshkitje të mëdha nga punimet me mjete të rënda, ndërsa sipër fshatit ishte edhe depoja e ujit. Megjithëse ka pasur reshje, depoja kishte shumë pak ujë.
Banorët thonë se problemet janë në zonën ujëmbledhëse në fshatin Lashkizë. Firma që po ndërton HEC-et e ka shtypur tubin që merr ujë. Në atë zonë duket se përroi i Lashkizës është betonuar. Ndërsa poshtë pjesës së betonit, firma që po bën HEC-in ka futur tubin e ujësjellësit.
“Firma ka dëmtuar pikërisht tubin e ujësjellësit, për pasojë ai nuk çon ujë në depo dhe në fund të fshatit. E gjithë zona është pa ujë. Tjetër problematikë është edhe shkarja e zonës nga punimet për HEC-in. Nga ko shkarje është dëmtuar rrjeti i ujësjellësit në pjesën më të madhe. Është totalisht i dëmtuar” thotë Ferit Hoxha.
Sipas dokumenteve, HEC-et Lashkiza 1 dhe Lashkoza 2 janë dhënë me koncesion më 27 qershor 2012. Dokumenti mban firmën e ish-ministrit të Ekonomisë Nasip Naço. Ndërkohë, më 5 maj 2015, pas ndryshimit të qeverisë, kryeministri Edi Rama ka miratuar në KKT lejen e ndërtimit për këto HEC-e. Në dokumente thuhet se pellgu ujëmbledhës i Lashkizës shtrihet në Dibër dhe është degë e lumit Drin i Zi. Në territorin e këtij pellgu janë vendosur vendbanimet e Lashkizës, Zall Dardhë.
“Ujësjellësi kushtoi 118 mln lekë”
Fiks Fare pyeti në Këshillin e Qarkut Dibër, ku mësoi se Ujësjellësi i Zall Dardhës është ndërtuar në vitin 2008 dhe ka kushtuar plot 118 milionë lekë. Shteti shqiptar ka investuar vetëm 10 milionë. Pjesa tjetër ka qenë një grant i qeverisë holandeze. Por, 10 vjet më pas, ujësjellësi është shkatërruar.
Gazetarët pyetën edhe në Drejtorinë e Ujësjellës Kanalizimeve në Dibër, ku përgjegjësi Aleksandër Mikli tha se e kanë konstatuar një problematikë të tillë.
“Ujësjellësi është dëmtuar rëndë nga firma që po ndërton HEC-in. Banorët janë prej disa javësh pa ujë. Kemi kontaktuar me inxhinierin e firmës, por deri më tani nuk e kanë rregulluar. Na kanë thënë se do të ndërhyjnë” thotë ai.
Fiksi pyeti edhe administratoren e firmës që po ndërton HEC-et Lashkiza 1 dhe Lashkiza 2, Liljana Deliu.
Ajo thotë se “mund të ndërhyjmë për ta rregulluar sa të mbarojë koha e keqe”. Më tej shton se për 3 muaj përfundojnë për HEC-in dhe më pas do të vijojë të rregullojë ujësjellësin. Pyetjes se çfarë investimesh ka bërë firma në zonë, Deliu i përgjigjet se ka rregulluar rrugë. Por, në fakt rrugët ishin në gjendje shumë të keqe. Ndërsa banorët e zonës i cilëson “të këqinj”. “Investimet e mia nuk mi siguron njeri. Prandaj zona është lënë në atë gjendje nga pushteti lokal”, thotë ajo.
Skandali i rradhës, HEC-i prish ujësjellësin në Peshkopi, ja sa miliona lekë ka kushtuar
Problemet e shkollave në Zall Dardhë
Krahas problemeve të shkaktuara nga HEC-et, Fiks Fare u ndal edhe te Shkolla e Mesme e Bashkuar “Zall Dardhë “dhe shkolla 9-vjeçare “Leshkizë”.
Të dyja shkollat, ishin në gjendje të mjeruar. Në Zall Dardhë, godina e shkollës nuk kishte ujë, drita, madje ishte e shkatërruar. Godina kishte lagështirë, kushtet janë shumë të këqija.
“Ne kërkojmë të bëjmë mësim në kushte optimale. Ujin për tualetet e mbushim në përrenj, me kova. Nevojat i bëjmë në natyrë. Shkolla nuk as ka pastruese” thotë një nxënës. Ndërkohë, brenda shkollës, muret kanë lagështirë, tavane të plasaritura, banka të vjetra. Tualetet kanë filluar të rregullohen provizorisht, janë suvatuar nga e para, por sërish ka shumë lagështirë. Drejtori i shkollë thotë se ka 3 muaj në detyrë dhe kushtet janë skandaloze. Më tej shton se shkolla nuk ka elementët e duhur të higjienës, kushteve për të bërë mësim.
“E kam ngritur disa herë këtë problematikë, kanë filluar të rregullojnë vetëm tualetet, por shkolla ka shumë probleme. Më kërkojnë të dërgoj e-maile. Me çfarë? Edhe shkollat e tjera të varësisë kanë probleme të mëdha” thotë ai.
Fiksi shkoi edhe në shkollën 9-vjeçare në Lashkizë. Megjithëse ishte ora 16.00 dhe mësimi kishte përfunduar, dera e shkollës ishte e shkatërruar. Një nga klasat ishte hapur, ndërkohë që e gjithë ambienti ka lagështirë. Dy nxënës, megjithëse janë në klasë të 9-të, e kanë të vështirë të lexojnë.
Drejtoria Arsimore e Dibrës na bëri me dije se ka marrë problematikën në fjalë dhe ia ka adresuar Bashkisë së Dibrës. Ndërkohë, Bashkia e Dibrës u tha gazetarëve të Fiks Fare se ka filluar të rregullojnë vetëm tualetet. Një grup nga Drejtoria e Shërbimeve ka shkuar në shkollë dhe po rregullon pjesërisht tualetet. Por këto ndërhyrje, nuk i rregullojnë problematikat në këto shkolla. Muret, tavanet dhe çatia janë të çara.
Për lajm-shqip:
Jorida Fataj
