Shtohen rastet me HIV-AIDS, sifiliz dhe sëmundje të tjera seksualisht të transmetueshme. Edhe pse nuk është mbyllur viti, numri i rasteve të reja me virusin HIV rezulton të jetë 70, në një kohë që gjatë gjithë 2011-ës janë shënuar 65 raste. Pjesa më e madhe e të infektuarve me HIV, mbi 80 përqind, vijnë nga radhët e heteroseksualëve, rreth 9 përqind nga homoseksualët dhe shumë më pak është transmetuar nga nëna tek fëmija. “Kryesisht rruga e marrjes është rruga heteroseksual, në 84 për qind të rasteve, 9 për qind të rasteve janë homo dhe biseksual dhe 4 për qind është nga nëna tek fëmija. Vetëm 1 për qind është nga persona që përdorin drogë”, thotë Halil Stana, Specilalist në Autoritetin Shëndetësor Rajonal.Shqetësim tjetër sipas mjekve janë dhe sëmundjet e tjera seksualisht të transmetueshme, ku rikthimi i sifilizit është një tjetër problem, që duhet të jetë në vëmendje të popullatës. Këto sëmundje janë pa shenja dhe specialistët thonë se çdo person që dyshon se nuk ka një jetë të rregullt seksuale të testohet. “Në ASHR bëhet testim vullnetar për HIV, Hepatitin B, C dhe Sifilizin. Aktualisht, gjatë këtij viti janë bërë rreth 1226 analiza të tilla, nuk na ka rezultuar njeri me HIV pozitiv, na kanë rezultuar me sifiliz, 4 raste dhe me hepatit B 19 raste”, thotë Stana. Të dhënat u bënë publike në ditën e dytë të Panairit të Shëndetësisë. Gjatë aktiviteteve me këtë rast kryen teste gjaku falas për të mësuar nëse janë mbartës të ndonjë infeksioni seksualisht të transmetueshëm apo hepatiteve.
20.11.2012
Burimi: Ikub.al
