Atentati në Ekuador, shqiptari ishte në makinë me bashkëshorten shqiptare dhe vajzën 3 vjeçare.
Mediat në Ekuador kanë zbardhur detaje të reja për atentatin që ju bë 2 ditë më parë një shqiptari.
Ai dyshohet si i përfshirë në një organizatë të trafikimit të kokainës. Sipas shefit të zyrës së Antikrimit atentati ndaj Remzi Azemit dyshohet se ka lidhje me trafikun ndërkombëtar të drogës.
Mediat vendase shkruajnë se Azemi lëvizte me një automjet të blinduar. Atij iu afruan dy persona që lëviznin me motoçikletë. Ata qëlluan në drejtim të tij 4 herë. Azemi ndodhej në shoqërinë e bashkëshortes së tij, shqiptare dhe vajzës 3 vjeçare. Asnjëra nuk ka marrë dëmtime.
Sipas policisë, Azemi kishte ndaluar automjetin, teksa bashkëshortja e tij po tymoste një cigare. Ajo kishte hapur përgjysmë xhamin e automjetit. Pikërisht kjo hapësirë është shfrytëzuar nga atentatorët për të qëlluar.
Sipas Cevallos, i plagosuri nuk është emër i panjohur për autoritetet atje.
Ai ka qenë i ndaluar në vitin 2014 gjatë operacionit të koduar me emrin “Ballkan”. Gjatë atij operacioni u arrestuan në total 11 persona. Mes tyre kishte shqiptarë, kosovarë dhe ekuadorianë. Ata ishin pjesë e një organizate narkotrafiku në Ekuador, Peru, Spanjë e Europë. Dyshime hidhen se ai u lirua pasi kishte pranuar të bashkëpunonte me autoritetet amerikane të antidrogës.
Azemi kishte patur lidhje edhe me shqiptarin Ilir Hidri. Ky i fundit është 39 – vjeçari i vrarë më 30 Maj të këtij viti po në Guayaquil. Ngjarja dyshohet se ka lidhje gjithashtu me pazaret e drogës. Shefi i Antikrimit tha gjithashtu se Azemi jetonte në një shtëpi me qira në pronësi të Hidrit.
Remzi Azemi ndodhet aktualisht në spital, jashtë rrezikut për jetën. Autoritetet po punojnë për të identifikuar dhe kapur dy atentatorët.
Burimi: Syri
10.11.2017
