Ligji për përdorimin e gjuhëve që përfshin edhe gjuhën shqipe si gjuhë zyrtare, ka mbetur peng i negociatave të emrit të Maqedonisë. Shqipja akoma në diskutim…
Shqipja zyrtare mbetet peng e negociatave te emrit Maqedonisë.
Sipas analistëve, ligji për përdorimin zyrtar të gjuhës shqipe në Maqedoni synohet të vendoset në pako me ligjet reformuese. Idea qarkullon në kuadër të dialogut mes liderit të opozitës, Hristian Mickoski me koalicioni qeverisës, Zoran Zaev dhe Ali Ahmetin. Kohë më parë, presidenti Gjeorgje Ivanov, ligjin për përdorimin e gjuhëve e ktheu sepse e vlerësoi në kundërshim me Kushtetutën. Pas këtij veprimi të presidentit, partia opozitare VMRO-DPMNE parashtroi 35 mijë amendamente për ndryshimin dhe plotësimin. Amendamentet bllokuan kështu proçedurën parlamentare.
Profesor Nikolla Dujovski, ligjërues i shkencave politike në Universitetin e Shkupit, foli për Radion Evropa e Lirë. “Ky ligj do të duhej të ishte pjesë e pakos së ligjeve reformuese. Por, përderisa dallimet janë aq të thella mes liderëve politikë. Për këtë çështje, i gjithë fokusi do të përqendrohet ne çështjen e emrit”, tha Dujovski.
Mendoj, vazhdon ai, se kjo çështje do të zgjidhet më vonë. Nuk është çështje me prioritet në punën e Kuvendit për shkak të mosarritjes së marrëveshjes mes liderëve politikë. Aktualisht duket se liderët janë të fokusuar në çështjen e emrit për të zhbllokuar proçesin e integrimeve, thotë Dujovski.
Ndërsa Arsim Sinani nga Qendra për Studime Ndërkombëtare dhe Hulumtime Ballkanike këtë ligj e vendos si prioritet integrimi. “Ligji që rregullon përdorimin zyrtar të gjuhës shqipe, është shtylla kryesore e Marrëveshjes së Ohrit. Pra, një dokument ky jetik për proçesin e integrimeve”, argumenton Sinani. “Pa zgjidhjen e zyrtarizmit të gjuhës shqipe, çdo zgjidhje tjetër do të ishte i mirëseardhur. Por lë boshllëk në raportet mes shqiptarëve dhe maqedonasve”, thotë Sinani. Kryeopozitari Mickovski edhe pas këtij takimit me Zaev dhe Ahmetin, këmbënguli se ligji gjuhëve është kundërkushtetues dhe i pazbatueshëm.
Kryeministri Zoran Zaev propozon formimin e një grupi ekspertësh…
Kryeministri Zoran Zaev propozon formimin e një grupi ekspertësh të së drejtës kushtetuese për të komentuar ligjin, për të papranueshëm. “Në Maqedoni ekziston Gjykata Kushtetuese. Nëse diçka është në kundërshtim me Kushtetutën, për këtë duhet të prononcohet Gjykata Kushtetuese”, ka theksuar kryeministri i Zoran Zaev.
Në fundjavë është realizuar një takim kokë më kokë mes liderit të BDI-së Ali Ahmetit dhe liderit të opozitës Hristian Mickoski. Mickoski tha se çështja e ligjit të gjuhëve nuk ka qenë pjesë e bisedimeve. Ndërsa Ali Ahmeti tha se ka marrë garanci nga lideri i opozitës se deputetët e kësaj partie do të mbështesin ligjet reformuese.
Për Lajm-Shqip
Engjëll Serjani
