Përqendrim te supersfida e së martës, kuqezinjtë zbarkojnë sot në mesditë në Lucernë
Fitorja ndaj Qipros të premten i ka entuziazmuar shqiptarët, të cilët tashmë besojnë se ndaj Zvicrës të martën, Kombëtarja do të bëjë një ndeshje të mirë, ku objektivi minimal është barazimi. Por për djemtë e trajnerit Xhani De Biazi koha e festës ka mbaruar dhe euforia i ka lënë vendin përgatitjeve për ndeshjen e radhës. Do të jetë një supersfidë si pak të tjera, sepse në të ndikojnë faktorë brenda dhe jashtë sportit. Tekniku italian nuk kërkon të humbë kohë dhe ka zbritur në fushë për të zhvilluar dy seanca stërvitore, paradite dhe pasdite, ndërkohë që në mesditë ka bërë një mbledhje me ekipin, ku ka analizuar ndeshjen e fundit të Zvicrës, e fituar me rezultatin 2-0 në fushën e Sllovenisë. Ansi Agolli e ka shlyer përfundimisht dënimin e dhënë nga UEFA me 3 ndeshje. Për mbrojtësin e majtë, takimi ndaj Qipros ishte i fundit ku do të mungonte. Tashmë 29-vjeçari është një alternativë luksi për trajnerin Xhani de Biazi. Kjo mund të bëjë që në formacionin anti-Zvicër të ketë ndryshime. Ndërsa sot, rreth orës 11:30 Kombëtarja do të lërë Tiranën për të fluturuar me çarter drejt Lucernës. Në këtë qytet, ku do të luhet edhe ndeshja, Shqipëria do të akomodohet në një hotel me 5 yje, “Radison Blu”, që do të jetë rezidenca e kuqezinjve për dy ditët e aventurës zvicerane. Sot, në orën 20:30, që është edhe orari zyrtar i ndeshjes së të martës, De Biazi dhe të tijtë do të zhvillojë stërvitjen e fundit në stadiumin “Suisspor Arena”. Mësohet se kthimi nga Zvicra do të bëhet të mërkurën në mëngjes drejt Tiranës. Gjithsesi gjithë përqendrimi është te supersfida. Interesimin e tifozëve kuqezinj për këtë ndeshje është i jashtëzakonshëm. Pak ditë më parë, institucioni i futbollit shqiptar arriti një marrëveshje me homologët zviceranë për sa u përket biletave. U ra dakord që për tifozët kuqezinj do të hidheshin në treg 4400 bileta. Federata e Futbollit të Zvicrës bëri një tolerim në këtë rast, duke pasur parasysh faktin se interesimi nga shqiptarët dhe kosovarët që jetojnë në shtetin helvet ishte i jashtëzakonshëm. Këto 4400 bileta të hedhura në treg për tifozët shqiptarë janë shitur në një kohë rekord. Mirëpo, fitorja në sfidën e parë eliminatore ka bërë që edhe ata tifozë, të cilët kanë pasur dyshime për të ndjekur ndeshjen nga shkallët e stadiumit të Lucernës, të hidhen në “sulm” për gjetjen e një bilete në momentet e fundit. Prandaj numri i tyre do të jetë edhe më i madh. Kapaciteti maksimal i stadiumit “Suisspor Arena” është 17.800 shikues. Thuajse gjysma e tij pritet që nesër të jetë i zaptuar nga ngjyrat kuqezi të tifozëve shqiptarë. Për sa i përket ndeshjes, Zvicra shikohet si favoritja absolute për fitoren finale. Sipas kompanive më të mëdha të basteve në Europë, triumfi i helvetëve llogaritet 1.35. Ndërkohë, barazimi ka koeficientin e lartë 4.69. Një fitore e Shqipërisë ka koeficientin 8.83. Kompanitë e basteve parashikojnë se rezultati më i mundshëm në këtë ndeshje do të jetë 1-0. Ky rezultat i ngushtë ka koeficientin 6. Një fitore e Shqipërisë me shifrat 1-0 llogaritet me koeficientin 16.3.
Analiza – Pas dy seancave stërvitore të ditës së djeshme, De Biazi ka zhvilluar një mbledhje me lojtarët, ku ka analizuar lojën e Zvicrës, në fitore 2-0 ndaj Sllovenisë
Interesimi – Interesimi i tifozëve shqiptarë për këtë sfidë është i madh. Përveç 4400 biletave të shitura për ta, pritet që gati gjysma e stadiumit e Lucernës të jetë kuqezi
Bastet – Zvicra shihet si favoritja absolute për fitoren finale, kuota për të në kompanitë e basteve është 1.35, barazimi 4.69, ndërsa fitorja e Shqipërisë ka koeficientin 8.83
10.09.2012
Burimi: Gazeta Shqip
