Shpërthimi i makinës të Liqeni/ 3 minutat që i shpëtuan jetën biznesmenit
Ndok Rajta, sipërmarrës në fushën e inerteve kishte vetëm 3 minuta që kishte zbritur nga makina kur shpërtheu eksplozivi që hodhi “Volkswagen-in”, me targa AA 946 EF.
Shpërthimi i makinës të Liqeni
Ngjarja ndodhi të enjten paradite, pranë Kodrave të Liqenit Artificial në Tiranë.
Shpërthimi i fuqishëm ka shkatërruar tërësisht makinën, duke dëmtuar edhe xhamat e disa objekteve përreth.
Por, fatmirësisht nuk ka pasur persona të lënduar.
Nga veprimet e para hetimore dyshohet se në makinë ka qenë e vendosur një sasi prej rreth 200-300 gramësh tritol.
Ndërsa aktivizimi i lëndës plasëse është bërë me telekomandë.
Autorët dyshohet se kanë ndjekur nga afër lëvizjet e biznesmenit 42 vjeçar, Ndok Rajta.
Të njëjtat burime thanë se autorët nuk kamë pasur si qëllim vrasjen e Ndok Rajtës.
Pasi shpërthimi ka ndodhur 3 minuta pasi ai ka zbritur nga makina.
Hetuesit thanë se atentatorët mund të kenë dashur ti japin një sinjal biznesmenit.
Rajta kishte një aktivitet në fushën e materialeve inerte pranë vendit ku ndodhi ngjarja.
Ai ka deklaruar para oficerëve të Policisë se nuk ka probleme me njeri.
Pistat e hetimit
Burime nga grupi hetimor thanë se Rajta nuk i ka orientuar te ndonjë person konkret tek i cili mund të ketë dyshime.
Megjithatë, deri tani janë ngritur dy pista nga ana e Policisë: E para ka të bëjë me ndonjë konflikt të mundshëm për çështje konkurrence në biznes, të cilën edhe vetë 42- vjeçari nga Dibra nuk e ka mohuar.
Ndërsa pista e dytë është ajo e ndonjë konflikti personal që ai mund të ketë pasur në të kaluarën.
Burimet thanë se, pavarësisht se biznesmeni ka mohuar të ketë pasur probleme, është verifikuar një konflikt i hershëm që ai ka pasur me disa persona nga Dibra, edhe pse ende nuk dihen me saktësi motivet e këtij konflikti.
Një tjetër version që po hetohet nga Policia, nisur nga deklarimet e biznesmenit, është dyshimi se objektivi mund të mos ketë qenë vetë Rajta.
Kjo për shkak se, sipas tij, automjeti që u hodh në erë nuk përdorej vetëm nga ai, por edhe nga punonjësit e kompanisë që administron.
Pra, sipas biznesmenit, automjeti ku ishte vendosur eksplozivi nuk është makina e tij personale, por e shoqërisë dhe përdoret edhe nga persona të tjerë.
Deri tani nuk ka asnjë person të ndaluar për ngjarjen e rëndë kriminale.
03.12.2017
