TIRANE – Dyfishim të biletës së transportit urban, rritje të masës së sigurisë për abonetë mujore, sidomos ato të studentëve dhe të përgjithshme. Këto janë kërkesat e Shoqatës Kombëtare të Transportit Qytetas, e cila kërkon të rritet me 40 lekë të reja bileta ditore e transportit urban, pra nga 30 lekë të shkojë 70 lekë. Po ashtu, rritje është kërkuar edhe për biletat mujore. Për këto të fundit, kryetari i shoqatës, Ferdinand Ibrahimi ka kërkuar që të rritet edhe masa e sigurisë, pasi kanë kapur me qindra raste që udhëtojnë me abone të falsifikuara. Gjatë prononcimit për “Gazeta Shqiptare”, Ibrahimi ka theksuar se shtrenjtimi i biletës është i domosdoshëm, pasi transporti urban është në kolaps për shkak të rritjes së çmimit të karburanteve dhe kostove të tjera shtesë mbi këtë sektor. Ibrahimi pohon se transportit në Shqipëri i nevojitet një rregullator, pasi situata e tanishme është kaotike.
Kërkesa
Shoqata e Transportit Qytetas, i është rikthyer kërkesës për rritje të biletës ditore deri në 70 lekë. Kërkesë kjo e bërë edhe një vit më parë, por që nuk u mor parasysh nga Bashkia e Tiranës. Kryetari i kësaj shoqate, Ferdinand Ibrahimi ka bërë të ditur se ata kanë zhvilluar edhe një takim me Bashkinë e Tiranës një ditë më parë për këtë çështje, por edhe për problematikat e tjera që ka sot transporti urban në kryeqytet. Veç të tjerave, një problem që haset sot në transportin urban është falsifikimi i aboneve të studentit dhe atyre të përgjithshme. Kryetari i Shoqatës së Transportit Qytetas, e cilëson qesharak çmimin aktual prej 30 lekësh, pasi sipas tij ka një diferencë të theksuar me vendet fqinje. “Ne kërkojmë që bileta ditore të shkojë 70 lekë. Shtrenjtimi me 40 lekë është i nevojshëm, se transporti është në kolaps. E kemi diskutuar edhe me Bashkinë e Tiranës kërkesën për rritjen e çmimit. Ditën e martë patëm një takim me përfaqësues të Bashkisë së Tiranës, por nuk arritëm në asnjë përfundim. Nuk gjetëm dot gjuhën e bashkëpunimit”, – ka deklaruar Ibrahimi. Një tjetër problem madhor për transportin publik, i ngritur edhe nga “Gazeta Shqiptare”, është abuzimi me abonetë, sidomos ato të studentit. “Kemi kapur me dhjetëra raste që udhëtojnë me abone studenti ndërkohë që janë 50-60 vjeçarë; veç asaj, ka edhe probleme se janë me qindra rastet që i kanë falsifikuar këto abone, pasi u mungojnë masat e sigurisë dhe nuk shiten me karton shoqërues. Kemi handikap në bashkëpunim me bashkinë dhe qeverinë. Këto institucione nuk na kanë pajisur me një dokument që të vërtetojmë kush është student. Të përdoren kartat e studentit për shitjen e aboneve të studentit ose vërtetime që lëshohen nga universitetet”, – sqaroi Ibrahimi. Abuzimi me biletat mujore është një problem i vazhdueshëm, sidomos për kategorinë e studentëve, pasi e vetmja mundësi për të gjetur një të tillë është në treg të zi, ku vlera e saj nga 600 lekë shkon në 800 ose 1000 lekë. Ky problem është ngritur vazhdimisht nga qytetarët, ndaj edhe Autoriteti i Konkurrencës, një muaj më parë ka nisur një hetim për këtë çështje. Rritja e çmimit të biletës së transportit urban, është një vendim që merret me vendim të Këshillit të Ministrave. Vendimi më i fundit i qeverisë për rritjen nga 20 në 30 lekë për biletën e transportit urban është marrë në vitin 2008. Normalisht, ky vendim nuk është vetëm për kryeqytetin, por për të gjitha linjat në mbarë vendin, edhe pse kërkesat për rritje të biletave kanë ardhur nga operatorët e Tiranës dhe jo të rretheve. Krahas rritjes së çmimit për transportin urban të Tiranës, shoqata e transportit do të kërkojë edhe rishikim në çmimin e transportit ndërqytetës dhe atë ndërkombëtar.
27.02.2013
Burimi: Balkanweb