Normalizohet situata në të gjitha akset rrugore të Qarkut të Korçës, përfshi edhe Qafë-Thanën. Për këtë, është dashur ndërhyrja e 6 borëpastrueseve për të mbajtur nën kontroll Qafë-Thanën, në juglindje, nga Lini deri në Prrenjas.
Vazhdon të mbetet situatë e rënduar me shi dhe dëborë, në veri e juglindje të vendit. Ndërsa, janë rikthyer përsëri përmbytjet në qarkun Vlorë.
Trashësia e borës në majën e Qafës së Thanës ka shkuar në 30 cm. Policia përgjatë gjithë natës nuk ka lejuar kalimin e mjeteve të tonazhit të rëndë dhe të papajisurat me zinxhirë.
Si rezultat i kësaj pune, i gjithë aksi rrugor, të gjitha rrugët nacionale të Qarkut të Korçës janë të kalueshme normalisht. Përjashtim bëjnë vetëm akset në zonat e thella malore, ku kalimi bëhet me zinxhirë.
Edhe në aksin Bulqizë-Peshkopi kalohet pa zinxhirë. Por, akset e tjera kalohen me zinxhirë dhe disa fshatra janë të bllokuara në njësinë administrative Zerqan dhe Trebisht.
Si pasojë e motit të rënduar, disa fshatra kanë mbetur pa energji elektrike në zonën e Devollit dhe në rrethin e Pogradecit. Në Stëblevë të Librazhdit bora arrin 70 cm, ndërsa në fshatin Jagodinë të Elbasanit u përmbytën 30 ha tokë nga përroi i Llixhës.
Pasditen e së martës, në Shkodër u bllokua aksi Shkodër-Theth dhe Shkodër-Breg Lumi. Disa akse në veri dhe verilindje janë të kalueshme me zinxhirë. Lartësia e borës në aksin Tunel-Kalimash është 20 cm, por rruga është e kalueshme dhe borëpastrueset janë në punë.
Nga reshjet shumë të dendura të rëna gjatë mesditës në qytetin e Vlorës ka pasur rritje të nivelit të ujit në disa rrugë. Në zonën e Dukat-Orikumit të gjitha familjet të cilat kanë banesat afër lumit të Izvorit janë paralajmëruar që të marrin masat për largim.
www.lajm-shqip.com
