Shembja e tre urave në Zonën e Dropullit është, ndoshta lajmi më serioz dhe me pasoja për Tiranën zyrtare këto ditë.
Shembja e urave të Dropullit do të kthehet në një cassus belli diplomatik, sapo të bëhen headline për mediat greke.
Dhe në këtë rast nuk kanë faj, nëse lëshojnë rrufetë e kritikave. Vetëm në një Bashki, ku jeton komuniteti grek, janë prishur tre ura, të cilat tregojnë metaforën e marrëdhënieve shqiptaro-greke. Ndoshta ato ura do të duhet të ishin një shembull i seriozitetit të shtetit shqiptar, edhe për urën e miqësisë me Greqinë. Një urë që rrëzohet, tregon se është ndërtuar keq, ose me qëllim, ose pa seriozitetin e duhur.
I takon qeverisë që të mos ja lërë Bashkisë Dropull që të merret me ndërtimin e urave, por me anë të një aksioni të shpejtë dhe si shembull, të ndërtojë menjëherë objektet e shkatërruara nga përmbytja në zonën Dropullit të Sipërm.
Rrëzimi u urave këto ditë si të ishin bukë peshku, po nxjerr lakrat e një byreku të madh korruptiv, që duhet të jetë objekt i menjëhershëm për SPAK dhe Prokurorinë e re. Janë kryesisht ura të ndërtuara nga pushteti vendor, gati me aksion, ku u morën fonde me shumicë për infrastrukturën rurale.
Ky mot i keq vërtetoi se ato tendera paskan qenë mullari i një korrupsioni skandaloz. Por në rastin e Dropullit, diçka edhe më e rëndë. Një kryq i madh faji, që nëse nuk riparohet me urgjencë, ka shumë gjasa të kthehet në një goditje diplomatike përpara negociatave të radhës Tiranë-Athinë. Jo vetëm kjo e fundit por edhe përpara vendimit për hapjen e negociatave të anëtarësimit me BE-në.
Për Lajm-Shqip
Ylli Pata
