Sekretet e Kretës: Athina tërhiqet nga variant i vjetër, Shqipëria fiton 200 kilometër katrorë
Megjithëse nuk thuhet, duket se ka një arritje thelbësore në negociatat dyditore. Negociatat u zhvilluan në Kretë mes Ministrit të Jashtëm grek, Nikos Kotzias dhe shefit të diplomacisë shqiptare Ditmir Bushati.
Athina është tërhequr përfundimisht nga varianti i rrëzuar nga Gjykata Kushtetuese. Shqipëria merr kontroll të plotë të pjesës së saj të Kanalit të Korfuzit. Ajo përfiton 200 kilometra katror hapësirë detare dhe nëndetare.
Të ngjashme mund të lexoni:
Më konkretisht, shkëmbi Barketa nuk do të jetë më si kufi bregdetar i Greqisë.
Kjo do të thotë se e humb rëndësinë që kishte në marrëveshjen e mëparshme që i jepte territorit vendit fqinj.
Marrëveshja mes palëve është: kufiri detar është vija mesore mes dy vendeve dhe kjo caktohet duke marrë si bazë brigjet.
Ndërkohë në rastet që shkëmbinjtë nënujore kanë pjesë edhe në anën tjetër do të përdoret një metodë tjetër. Ajo metodë që përdoret edhe në të drejtën ndërkombëtare.
Parimi i zgjidhjes së drejtë apo equitable solution, i konsideron si të rëndësishëm vetëm ishujt e banuar, në funksion të përkufizimit të kufijve detarë, përkatësisht shelfit kontinental.
Me ndarjen e re, bregdeti i Himarës do të ketë 12 milje detare si det territorial të Shqipërisë. Ndërsa ishulli Othonoi 6 milje.
Nëpërmjet zbatimit të kombinuar të këtyre parimeve Shqipërisë i rikthehen mbi 200 kilometra katrorë të humbur me marrëveshjen e vjetër. Bëhet fjalë për parimin mes vijës së mesme dhe atij të equitable solution.
Me këtë zgjidhje kanë fituar të dy palët, por më shumë ka fituar Greqia. Ajo nis të ndajë detin dhe pritet të kërkojë të njëjtën marrëveshje edhe me Turqinë, Egjiptin dhe Libinë.
Në muain dhjetor Athina po përgatitet për një zhvillim shumë të rëndësishëm politik.
Bëhet fjalë për vizitën e Presidentit të Turqisë, Rexhep Tajip Erdogan, që krerët grekë duan ta organizojnë në mënyrë “prefekte”.
Tsipras shpreson që të marrë nga Erdogan “OK” për një zgjidhje të kufirit detar. Gjithashtu shpreson edhe një ndërmjetësim të Ankarasë për çështjen e Maqedonisë.
Siç mësohet, negociatat edhe pse janë zhvilluar dyshe, ata prapa kanë pasur në çdo hap SHBA-në.
Që nga shtatori, SHBA ka hyrë fuqishëm në Ballkan për të zgjidhur një e nga një të gjitha çështjet duke e mbajtur larg influencën e Moskës.
Presidenti i SHBA-së, Donald Trump e ka takuar dy herë kryeministrin grek Tsipras. Një herë në Bruksel dhe një herë në Uashington.
Mësohet ka folur që Athina të mbyllë përfundimisht problemet që ka me fqinjët ballkanikë.
SHBA synon ta vulosë përfundimisht largimin e konfliktit nga Ballkani, që më pas të merret vetëm me Lindjen e Mesme.
Në muajin gusht, Sekretari Amerikan i Shtetit, Rex Tillerson, ka zhvilluar një bisedë telefonike me kryeministrin shqiptar Edi Rama.
Ai ka marrë përsipër që të negociojë me Athinën për paktin e detit.
Ndërkohë, enigma e madhe mbetet çështja e varrezave, për të cilën thuhet se ka një dakordësi. Ende nuk ka informacion se si do të zgjidhet.
Një burim diplomatik bëri me dije se Bushati ka marrrë përsipër të zbatojë marrëveshjen e qeverisë “Berisha” në 2006.
Ndërkohë për çështjen çame gjithçka është lënë pezull dhe pritet të diskutohet gjatë vizitës së Kotziasit në Tiranë.
Në këtë dimension është rënë dakord që qytetarët shqiptarë me origjinë nga Çamëria do të lejohen të hyjnë në Greqi.
Për Lajm-Shqip
Ylli Pata
