Kampioni i kik-boksit, Xhavit Bajrami dhe prezantuesja e njohur po hapin biznes në Tiranë, ndërkohë që planifikojnë martesën.
Moderatorja Rudina Magjistari dhe kampioni kosovar i kick-boksit, Xhavit Bajrami, tashmë po bëjnë plane serioze për jetën, ndërsa shihen gjithmonë e më shumë bashkë këto kohë në Tiranë. Rudina e nisi vitin 2013, me një rrëfim të rëndësishëm personal për veten, historinë e dashurisë në lidhjen dyvjeçare me kampionin e kick-boksit, Xhavit Bajrami me origjinë nga Kosova, por që bën karrierë në Zvicër. Moderatorja e “Tv Klan” vendosi ta rrëfente vetë historinë e saj në emosionin “Zonë e Lirë” të Arian Çanit, duke e përshkruar si një njohje që nisi nga një mesazh i ardhur në facebook, dhe që pas takimit u konsiderua nga të dy “dashuri me shikim të parë”. Kjo lidhje u mbajt e fshehtë për dy vjet nga Rudina, ndërkohë që tashmë duket se lidhja e tyre ka hyrë në një fazë shumë serioze. Këtë javë Rudina dhe Xhaviti janë shfaqur për herë të parë çift në publik, ndërsa kanë qenë të pranishëm në festën që ka organizuar Inva Mula e Ethem Ramadani për 1- vjetorin e vajzës së tyre në Durrës. Ndërkohë që Xhaviti tashmë po jeton në Tiranë, pasi është duke përgatitur vendosjen e tij këtu, fillimisht me hapjen e një palestre gjigante, që është duke u ndërtuar pranë Universitetit Europian të Tiranës. Rudina do e zhvendosë po ashtu qendrën e saj estetike, për ta bashkuar biznesin e saj me Xhavitin. Pas kësaj, ata thuhet se kanë planifikuar dhe një martesë, për të cilën ishte Xhaviti ai që pohoi se vendimin për të lidhur kurorë po ia lënë kohës, me qëllimin për t’iu shmangur deklaratave të forta publike, por më shumë për ta lënë surprizë këtë vendim. Ndërkohë për kampionin 37-vejçar të kick-boksit, kthimi i tij në Shqipëri është një vendim i menduar mirë, për faktin se ai mund ta lërë sportin dhe të vazhdojë punën tashmë si trajner, një punë që e bën ndërkohë në Zvicër. Nga ana tjetër, Rudina, paralelisht me emisionin e pasdites në “Tv Klan”, prezanton dhe spektaklin e talenteve për fëmijë “Gjeniu i vogël”, që shumë fansa në rrjetet sociale e kanë komentuar si një rastësi të mirë për t’i sjellë asaj dhe një fëmijë së shpejti.
Historia e dashurisë që nisi virtiualisht me Xhavitin
Historia e Rudinës me Xhavitin filloi para më shumë se dy vitesh, kur ajo e kishte të ftuar në programin e saj, ndërkohë që ka deklaruar se më parë nuk dinte asgjë për të. Njohja fillimisht ishte virtuale, pas një mesazhi që i kishte shkruar Xhaviti, edhe pse s’ishin miq në facebook. Përshëndetja e Xhavitit për Rudinën vinte nga Tokio, vendi ku ai ushtronte sportin e tij, që konsiderohet një “sport luftarak”. Ai është një djalë shtatlartë, pra 1.97 cm, dhe Rudina e ka theksuar si një nga elementet kryesore që e ka bërë interesant në sytë e saj, pasi për të, djemtë e gjatë janë tërheqës. “Mendoj se ishte vërtet një goditje në atë moment. S’më kishte ndodhur kurrë në jetë një gjë e tillë. Pastaj kjo u plotësua edhe me gjëra të tjera dhe u kompletua e gjitha. Kishte një lloj solariteti në portret, kishte shumë dritë në pamje dhe gjithashtu edhe buzëqeshja e tij ishte shumë diellore”, gjë që goditi menjëherë. Unë besoj te dashuria me shikim të parë, sepse e di që u ka ndodhur njerëzve, por nuk besoja se do të më ndodhte mua ndonjëherë. Është diçka e vështirë dhe shumë e rrallë që ndodh, dhe tek-tuk dikujt mund t’i qëllojë të provojë diçka të tillë në jetë. Jetova një moment shumë të bukur”, ka qenë një nga deklaratat e Rudinës për këtë histori. Fakti që Xhaviti jetonte në Zvicër ka qenë arsyeja e mbajtjes së fshehtë të lidhjes, sipas saj. Ndërkohë që tani me hapjen e biznesit të përbashkët dhe jetës së tyre në Tiranë, Rudinës do i plotësohej dëshira që ka shprehur se nuk do të dëshironte ta shihte të dashurin e saj në ring, pasi e konsideron sport të rëndë dhe e shqetësojnë ato pamje”. Tashmë, të dy në një mënyrë apo tjetër janë shprehur se të ardhmen e shohin bashkë.
Rudina: Për të konsoliduar lidhjen na ndihmoi distanca
Lidhja e tyre deri para pak kohe konsiderohej lidhje në distance, përderisa jetonin në shtete të ndryshme dhe takimet i kishin shumë të rralla. Gjithsesi, për Rudinën ky fat i lidhjes larg është konsideruar si favor, pasi i ka dhënë asaj kohën e mjaftueshme për ta parë me ftohtësi dhe për të reflektuar se ku po e çonte kjo lidhje. Rudina ka pohuar se e ka pasur të vështirë ta pranojë këtë lloj sporti që ushtron Xhaviti, duke e konsideruar si më të vështirin që kërkon përqendrim dhe kalkulim të madh të lëvizjeve e, që nëse do ta ndiqte në ring, do të ndihej vërtet e shqetësuar. Ndërkohë që ajo e ka shprehur hapur që me Xhavitin i ndodhi një goditje e fortë dhe që ka jetuar momente shumë të bukura, të cilat pak njerëzve u ndodhin në jetë.
Xhaviti: Shkojmë shumë me njëri-tjetrin, martesën ia lëmë kohës
Nga ana tjetër, kampioni i kick-boksit në rrëfimin e tij mediatik për gazetat kosovare, ka pohuar se: “është një lidhje shumë e bukur kjo me Rudinën dhe shkojmë shumë me njëri-tjetrin. Ndihemi shumë mirë dhe të tjerat ia lëmë kohës”, duke nënkuptuar martesën. Pas publikimit të historisë së dashurisë midis tij e Rudinës, ai tregoi variantin e tij të njohjes duke pohuar: “Fillimisht kemi folur përmes internetit, pastaj jemi takuar për disa çështje pune dhe, kështu, pak nga pak ka ndodhur e gjitha”, rrëfen kampioni. Për shkak të punës, atij i duhet të jetë gjithë kohën në lëvizje, dhe kjo ka bërë që çifti të jetojë një marrëdhënie në distance. Mirëpo duket se largësia nuk i bën përshtypje sepse, siç pohon edhe ai vetë, teknologjia i ka mundësuar të jenë gjithë kohën bashkë. Prania e Rudinës nuk e pengon aspak punën dhe karrierën e tij. Pyetjes a ka ndikuar Rudina që ai të lërë pas dore sportin, Xhaviti i është përgjigjur: “Jo aspak. Përkundrazi, ajo më motivon edhe më shumë për të qenë i suksesshëm në këtë pasion dhe profesion timin që është sporti”, ka thënë Bajrami.
Kush është Xhaviti, i njohur si “xhentëllmeni” në botën e kik-boksit
Ai ka lindur në Dumosh të Podujevës, por që në moshë të vogël ka emigruar në Zvicër dhe aktualisht njihet si një nga kampionët e sportit luftarak, kik-boks. Xhavit Bajrami është kampion botëror në kategorinë e rëndë në versionin ISKA, titull të cilin e mban nga viti 2004. Ndërkohë që ai ka bërë publike disa plane për jetën pas daljes në pension. Ndeshjen e fundit, “Xhentëlmeni”, siç dhe njihet ai në botën e kik-boksit, e kishte zhvilluar në korrik të vitit 2012, ku kishte mbrojtur titullin e kampionit botëror për peshat e rënda, duke e mposhtur me KO japonezin Takenori Onda. Krahas pjesëmarrjes aktive nëpër gara, Bajrami ka edhe një shkollë të vetën, ku u mëson të rinjve se si të bëhen kampionë të ardhshëm. Në këtë aktivitet privat ai kalon një pjesë të mirë të kohës të tij. “Kik-boksi bën pjesë në sportet marciale dhe është një sport të cilin unë e dua shumë. Ndaj dëshiroj të punoj gjithmonë për të, në mënyrë që të rinjtë ta kuptojnë thelbin dhe filozofinë e këtij sporti burrëror”, shtoi Bajrami, duke theksuar se tashmë ka nisur të mendojë edhe për largimin e mëvonshëm nga ky sport. “Unë nuk do të ndeshem gjithë jetën në ring, ndaj edhe mbyllja e karrierës sime me një ndeshje finale pas pak kohësh do të vijë natyrshëm”, ka thënë ai. Megjithatë, kik-boksi do të jetë gjithmonë primar për të. “Pasi të dal në pension, do të merrem me promovimin e këtij sporti, por edhe të sporteve në përgjithësi. Ky është një ndër objektivat që kam”, ka theksuar kampioni botëror, ndërsa lë të kuptohet se jeta e tij do të vazhdojë si trajner në Tiranë.
04.05.2013
Burimi: Panorama
