Rriten çmimet e mallrave të konsumit
Deficiti tregtar është rritur më 7. 8 % duke arritur në 207 milionë dollarë. Rritja e importeve për mallrat e shportës është pasqyruar në rritjen e çmimeve në treg. Kjo rritje vjen kryesisht për shkak të kursit të këmbimit. Eksportet në muajin maj u rritën me 8.6% në krahasim me muajin prill, bën me dije INSTAT , duke saktësuar se kjo rritje e përkthyer në lekë është 22.368 milionë. Sipas raportit më të fundit të publikuar nga Instituti i Statistikave, u importuan 44.850 milionë lekë mallra me rritje 8.2 % në krahasim me Prill 2013 dhe rritje 1.1 % në krahasim me Maj 2012. Defiçiti tregtar i këtij muaji është 22.482 mln lekë, duke shënuar një rritje prej 7.8 për qind krahasuar me muajin paraardhës dhe një ulje prej 10.2 për qind krahasuar me Maj 2012. Sipas Institutit të Statistikave, ka një rritje të eksporteve krahasuar me prillin e një viti më parë, duke ndikuar kështu drejt në ngushtimin e deficitit. Kështu, në prill 2013 u eksportuan 205 milionë dollarë mallra, me rritje 6.7 për qind, krahasuar me një vit më parë dhe rritje me 14.4 për qind krahasuar me prillin 2012.
Ndërkohë që importet kapën vlerën 413 milionë dollarë mallra me rritje 8.3 për qind në krahasim me një muaj më parë dhe rritje 3.6 për qind në krahasim me prill 2012. “Deficiti tregtar i këtij muaji është 207 milionë dollarë lekë, duke shënuar një rritje prej 10 për qind krahasuar me muajin paraardhës dhe një ulje prej 5.3 për qind krahasuar me prill 2012”, thuhet në raportin e INSTAT . Rritjen më të madhe në grupin e eksporteve e kanë pasur grupi i materialeve të ndërtimit dhe metaleve. Ndërsa importet më të larta kanë qenë në grupin e produkteve kimike dhe plastike. Partnerët tanë tregtarë kanë vijuar të mbeten vendet fqinje, si Italia dhe Greqia, ndërkohë që 66 për qind e tregtisë zhvillohet me vende që janë pjesë e Bashkimit Europian. Gjatë 20 viteve të fundit, Shqipëria ka pasur në mënyrë konstante një defiçit tregtar.
Gjatë viteve 2010 – 2012 vihet re një rritje e eksporteve, edhe pse ritmi i rritjes ka qenë në ngadalësim. Ndërkohë importet për vitet 2010-2011 janë rritur edhe në vlerë edhe në ritëm rritjeje, që ka thelluar deficitin tregtar. Për vitin 2012 kemi një ulje të importeve në vlerë absolute dhe relative. Në total efekti mbi bilancin tregtar është një rritje e defiçitit me 10% ne 2011, dhe një ulje e tij prej rreth 9% në 2012, duke bërë që viti 2012 të krahasohet me vitin 2010 për madhësinë e defiçitit tregtar. Partnerët kryesorë në tregtinë e jashtme gjatë këtyre dy viteve mbeten Italia dhe Greqia. Mallrat kryesorë të tregtuar janë tekstilet/ këpucët dhe mineralet/lëndët djegëse/elektriciteti.
27.06.2013
Burimi: Shekulli.com