Një fshat i largët në malësinë që ndan kryeqytetin me Elbasanin, po i afrohet çdo ditë e më shumë këtij të fundit. Rrëshqitja e tokës e ka zhvendosur Cërujën e Funarit për dhjetra metra në vit drejt Elbasanit.
Rrëshqitja e tokës në Cërujën e Funarit, e zhvendos atë afër Elbasanit.
Të paktën prej një dekade e gjysëm ky fshat jeton mes rrëshqitjes së tokës, bashkë më banesat e tyre. Dukuria në fjalë zë fill që në vitin 2002. Atëherë një lagje e tërë u zhvendos brenda një nate afër përroit të lagjes së Poshtëme. Kjo ka qenë arsyeja, që Sejdini dhe Balla kanë inspektuar nga afër rrëshqitjet e tokës në këtë fshat. Nga një, janë bërë dy lagje të këtij fshati. Ato po zbresin me vrik tatëpjetën. Shtëpitë janë bërë të pabanueshme dhe jeta e banorëvëe është në rrezik serioz. Kryetari i Bashkisë, Sejdini me kreun e Grupit Parlamentar të PS, Balla, u bëjnë apel banorëve për t’u larguar sa më shpejt.
-“Ne e njohim gjendjen, unë e njoh që në vitin 2002. Kam qenë prefekt në atë periudhë. Dhe atëherë 28 familje kanë marrë dëmshpërblim. Kemi bërë përgatitjen e dokumentave për pjesën tjetër, që kanë mbetur. Por unë, vetëm ju bëj një thirrje, që duhet të ikni nga këtu”, – ka deklaruar kryebashkiaku.
Ndërsa Kryetari i Grupit Parlamentar Balla, ka deklaruar: – “Bashkë me kryetarin kemi verifikuar gjithë dokumentacionin. Rezulton se në vitin 2002-2003, është bërë një kompensim nga ana e Qeverisë. Natyrisht, sipas çmimeve të kompensimit të asaj kohe. Rrëshqitja e re ka shkaktuar dëmtime edhe në banesa të tjera. Këto nuk kanë qenë pjesë e verifikimit në dokumentacionet e asaj kohe.
Unë do t’u bëja thirrje të gjithëve që kjo zonë duhet evakuuar menjëherë . Sepse ashtu siç e konstatojmë , nga momenti në moment pritet që rrëshqitja të vazhdojë. Kështu që, për ne më e rëndësishmja, janë jetët njerëzore për të cilët duhet të biem të gjithë dakord që të evakuoheni.”- ka përfunduar Balla. Përkundër deklaratave të dy pushtetarëve, nuk vihet re asnjë premtim se ku duhet të evakuohen këta fatkeqë? Cërujën, po e afron rrëshqitja çdo ditë e më tepër më Elbasanin …!!! Banorët gjithashtu kanë kërkuar ndihmë për t’u strehuar në pamundësi të një zgjidhje tjetër përballë një fenomeni natyror i cili ka nisur 20 vite më parë dhe tashmë ka marrë përmasa masive.
PërLajm-Shqip
Alfrida Danushi
