TIRANE- Nuk kisha asnjë qëllim kur i preva rrugën kryeministrit, ishte thjesht një rastësi”, këto janë fjalët që ka deklaruar para strukturave të policisë së kryeqytetit, 28- vjeçari, Ervis Hoxha, i cili pak ditë më parë i preu rrugën eskortës së kryeministrit të vendit, Sali Berisha.
Burime nga policia sqarojnë se i riu nga Lushnja ka rrëfyer para forcave blu se incidenti me eskortën e kryeministrit ka ndodhur në mënyrë të rastësishme, pasi ai nuk e ka ditur fare se në atë moment në rrugë ishte duke kaluar eskorta e Berishës. Hoxha në dëshminë e tij ka rrëfyer se pikërisht në atë orë ka qenë duke shkuar për të marrë familjen e tij pranë ‘Kishës Katolike’.
“Shkoja që të merrja familjen time dhe nuk kam pasur asnjë informacion se në atë orë do të kalonte eskorta e kryeministrit, ka qenë një rastësi. Unë nuk kisha planifikuar asgjë”, ka pohuar i riu nga Lushnja. Madje, ai ka pranuar para forcave të policisë se atë ditë ka qenë edhe pak i dehur, gjë që ka ndikuar në krijimin e këtij incidenti.
Ervis Hoxha ka sqaruar forcat blu se për atë ishte hera e parë që vinte në kryeqytet dhe nuk i njihte mirë rrugët. I riu nga Lushnja mësohet të ketë thënë se “unë e kisha për herë të parë që udhëtoja nëpër rrugët e kryeqytetit. Nuk i njihja rrugët e Tiranës dhe nuk e dija se rruga pranë ‘Kishës Katolike’ ishte vetëm njëkalimshe”. Pas këtyre deklaratave, policia ka arritur në konkluzionin se incidenti nga ana e të riut është bërë në mënyrë të paqëllimshme. Kjo ka qenë edhe arsyeja se pse gjykata ka vendosur që i riu të procedohet në gjendje të lirë.
NGJARJA
Incidenti me eskortën e kryeministrit u shënua mbrëmjen e së hënës në kryeqytet, kur një automjet që drejtohej nga 28-vjeçari, Ervis Hoxha ka hyrë në krahun e kundërt të lëvizjes, duke i prerë rrugën eskortës. Kjo ka vënë në alarm truprojat e kryeministrit, të cilët kanë dyshuar për ndonjë veprim të qëllimshëm ndaj tij dhe menjëherë forcat e policisë kanë vënë në pranga të riun nga Lushnja, ndërsa ekspertët e qarkullimit rrugor i kanë bllokuar lejen e qarkullimit. Pas marrjes në pyetje të 28-vjeçarit, policia ka dalë në konkluzionin se i riu nuk ka pasur asnjë qëllim ndaj kryeministrit, duke ndikuar në këtë mënyrë në vendimin e gjykatës, e cila ditën e mërkurë e ka lënë të lirë të riun nga Lushnja.
08.02.2013
Burimi: Balkanweb
