Risi, Albania dhe MBZHR shpallin konkursin ‘Festat Lokale’.
Risi, Albania dhe Ministria e Bujqësisë dhe Zhivillimit Rural (MBZHR) kanë shpallur konkursin “Festat Lokale”, me synim promovimin e vlerave tradicionale në funksion të turizmit.
Zonat rurale dallojnë nga njëra-tjetra nga larmia e vlerave etnografike dhe festat lokale janë me interes për të tërhequr turistë.
“Festat Lokale” është konkursi i parë kombëtar i fokusuar në zonat turistike të përfshira në strategjinë qeveritare të “100 Fshatrave”.
Kjo është një mënyrë për të nxitur zhvillimin e festivaleve të fokusuara rreth traditave, legjendave, kulinarisë dhe gastronomisë tradicionale.
Qëllimi i konkursit për festivalin tradicional është tërheqja e sa më shumë turistëve për të zgjatur sezonin turistik në këto rajone.
Projekti synon të promovojë produktet tipike lokale dhe rritjen e të ardhurave nga turizmi në zonat rurale me asete turistike.
Një përfitim tjetër i banorëve është rritja e mundësive të punësimit, për të rinjtë dhe grupet e margjinalizuara.
Festat lokale janë një mundësi për të gjeneruar ekonomi lokale dhe për të bërë të njohur zonat rurale anekënd vendit.
Thirrja për aplikim është bërë nga Ministria e Bujqësisë dhe Zhvillimit Rural në bashkëpunim me Ministrinë e Turizmit dhe Mjedisit.
Dy ministritë të mbështetura nga donatorët kanë ftuar bashkitë, organizata dhe shoqëri të linjës të aplikojnë deri në 20 prill 2018.
Aplikimet priten pranë Ministrisë së Bujqësisë dhe projektet fituese do të mbështeten nga MBZHR, MTM dhe Risi Albania.
Për Lajm-shqip
Engjëll Serjani
