Rinard Tata do të dalë nesër para Gjykatës së Shkodrës.
Do të dalë para miqve të tij të shumtë, për të thyer sërish drejtësinë e qytetit të cilin ai e zotëron thuajse prej afër dy dekadash.
Është ndaluar disa herë. Madje akuzuar edhe për vrasje. Për tre ekzekutime, mes tyre dy vëllezër. Asnjëherë prokuroria dhe policia nuk ia faktuan dot.
Sigurisht që në bashkëpunim edhe me gjykatën e rrethit Shkodër. Rinard Tata, ka disa emra dhe disa mbiemra dhe është nga një fshat i Malësisë së Madhe. Ai tashmë do të përballet me një akuzë të kopsitur. Akuzë aq sa vështirë që Rinard Tata të ketë mundësinë t’i “blejë” më!
Janë përgjime telefonike, ambientale, një sërë vëzhgimesh dhe ndjekjesh që i janë bërë jo vetëm Tatës po edhe njerëzve më të cilët ai punonte.
Prokuroria disa prej materialeve pritet t`i sjell në gjykatë teksa Tata dhe grupi i goditur pak ditë më parë do të njihen me masën e sigurisë.
Burime konfidenciale nga Shkodra bëjnë të ditur se prej më shumë se 10 muajsh është kërkuar të mbahen nën mbikëqyrje. Kjo sepse nevojitet që të mundësohet kapja në kushtet e flagrancës dhe jo vetëm kaq. Dyshimet tashmë përfshijnë shfrytëzimin e prostitucionit jo vetëm në atë godinë por edhe në disa vende të Europës.
Tata, i cili është ndaluar edhe disa herë të tjera, nga një sërë denoncimesh, është lënë i lirë. Justifikimi i tij lidhej me faktin se dy femrat ishin gratë e tija.
Po ashtu edhe ato sa herë kanë dëshmuar, kanë dëshmuar të njëjtën gjë. Dhe gjykata e gjyqtarët janë bindur.
Rinard Tata është lënë i lirë, pasi ai thjesht bashkëjetonte me dy gratë.
Dhe se nuk bënte asnjë vepër penale.
Por të dhënat hetimore tregojnë se bëhet fjalë për shfrytëzim prostitucioni në Itali, Belgjikë dhe Zvicër. Të dhënat tregojnë se aktivitetin më të madh e ka patur kryesisht në belgjikë për shumë vite me radhë. Po ashtu edhe në Shkodër, konkretisht në vendqëndrimet e tij, aty ku ai kishte edhe kafen-hotel, në të cilën shfrytëzoheshin femra të shumta.
Denoncimi që vuri në lëvizje prokurorinë, ishte nga një qytetar i cili nxori thuajse me detaje gjithçka ndodhte në atë godinë që ishte biznes i Tatës në lagjen Parrucë.
U ndaluan vajzat dhe më pas u lanë të lira. U tha se policia ishte gjithnjë në anën e tij. Po ashtu Tata njihej edhe për mbështetjen që i kishte dhënë Partisë Socialiste në zgjedhje jo vetëm këtë herë. Ndaj edhe policia mësohet se stepej sa herë jepej informacion për shfrytëzim prostitucioni, kryesisht të mitura nga ai dhe grupi i tij.
Për Lajm-Shqip
Jera Gega
20.11.2017
