Një dosje e mbyllur në ngarkim të nipërve të Adriatik Llallës, është hapur sërish në Elbasan.
Madje nga e njëjta prokurore.
Kjo e fundit është në proçes gjyqësor edhe me paraardhësin e prokurorit të Elbasanit.
Në këtë prokurori, është konstatuar se një sërë çështjesh hetimore janë mbyllur pa asnjë mbështetje ligjore.
Njëra prej tyre ka për emra nipërit e ish-kryeprokurorit Adriatik Llalla.
Akuza brenda dosjes së pushuar bën fjalë për dy çështje hetimore, “Fshehje të ardhurash” dhe “Mashtrime me Tvsh”.
Mësohet se dy nipërit e Llalës, kanë një kompani.
Dhe se biznesi i tyre ishte vënë në hetim nga Drejtoria e Tatimeve dhe Prokuroria e Elbasanit.
Ky proçedim penal dhe katër dosje të tjera analoge, do të pushoheshin.
Kjo, kur në krye të prokurorisë së Elbasanit, ishte Dritan Gina.
Sipas burimeve nga prokuroria e Elbasanit, dosjen e rihapur të kompanisë së nipërve të ish-kryeprokurorit Llalla i heton e njëjta prokrurore.
Ajo që i kishte, Amanda Xhaferi. Ndërsa ajo sapo kishte nisur hetimin e fletëve të para të kësaj kompanie, Gina, do t’ja hiqte këtë të drejtë.
Dosja i është rikthyer sërish prokurorës Xhaferi.
Rikthehet hetimi për nipërit e ish-prokurorit Llalla
Kjo e fundit tashmë është duke vijuar hetimet për nipërit e Adriatik Llallës.
Ndërsa konflikti gjyqësor, Gina e Amanda Xhaferi, mbetet i hapur.
Teksa ishte një konflikt verbal mes tyre, ka përfunduar në konflikt juridik.
Për shkak të privimit të hetimit të dosjeve në fjalë, prokurorja Xhaferi ka bërë kallëzim penal në polici kundër Dritan Ginës dhe dy zëvendësave të tij.
Burime koofidenciale bëjnë me dije se ky kallëzim penal do të pushohej nga vetë Gina, kur drejtonte institucionin e akuzës në Elbasan.
Mësohet se gjykata e Elbasanit, ka shpallur moskompetencën e saj për këtë gjykim.
Kësisojë, ia ka kaluar gjykatës së Kavajës.
Tashmë, ish-prokurori i Elbasanit, Gina dhe prokurorja, Xhaferri, do të mund të përballen në Kavajë.
Ndërsa hetimi ndaj dosjes së nipërve të ish-Prokurorit të Përgjithshëm është duke u hapur fletë për fletë.
Alfrida Danushi
15.02.2018
