Kryeministri Edi Rama shprehet se zgjedhja e kryeprokurorit të ri duhet të jetë një zgjidhje e përbashkët si një pikënisje për një Pakt Kombëtar për Evropën që duam.
Përmes një postimi në rrjetet sociale, Rama ka ftuar opozitën që të paktën në 6 muajt e ardhshëm, ti vihemi në dispozicion së bashku përpjekjes për të siguruar çeljen e negociatave.
Postimi i Edi Rama:
Nuk dua të bëj asnjë gjyq publik të qëndrimit të derisotëm të opozitës. Nuk e kam gjëkundi qëllimin të tregoj këtu pse ne po bëjmë gjënë e duhur për vendin. Opozita po bën gjënë e gabuar duke e goditur vendin në gjuhë të huaj.
Dua vetëm të arsyetoj ftesën publike për opozitën që, të paktën në gjashtë muajt e ardhshëm, t’i vihemi në dispozicion së bashku përpjekjes për të siguruar çeljen e negociatave. Duke bashkërenduar nismat e veprimet e nevojshme për ta çuar jo qeverinë, po Shqipërinë në fitoren e kësaj sfide të vështirë, por krejtësisht të mundur tanimë, shkruan Rama.
Në vijim ai shton “opozitës nuk i kërkon kush qe të heshtë, aq më pak mund të më shkojë mua në mendje diçka e tillë”.
Çka unë i kërkoj opozitës është të konsiderojë pa humbur kohë ftesën që të ulemi në tryezë për çështjen aktuale të Prokurorit të Përgjithshëm. Si dhe të bëjmë një Pakt Kombëtar për Europën që duam.
Të thjeshtë, të qartë dhe serioz. Me disa hapa të përbashkët drejt çeljes së negociatave (dhe pse jo edhe përtej nëse ka mundësi në rrugën e arsyes).
Shprehje e vullnetit të mirë për ta vënë Shqipërinë mbi partitë dhe axhendën e përbashkët kombëtare mbi axhendat e përveçme të politikës së ditës, shkruan Rama.
www.lajm-shqip.com
