Kryeministri i vendit, Edi Rama nis një vizitë dyditore në Berlin. Fokus i bisedës së tij me kancelaren gjermane, por jo vetëm do të jetë për pritshmëritë që do t’i duhen Shqipërisë të përmushë që të hapen e bisedimet për anëtarësimin e Shqipërisë në BE.
Në ditën e dytë, Kryeministri Rama do të shkojë edhe në Bundestagun gjerman. Ky institucion do të marrë vendimin për hapjen ose jo të negociatave. Është planifikuar një seancë bashkëbisedimi mes Kryeministrit dhe Komisionit të Jashtëm në Bundestag.
E veçanta është se ky Komision drejtohet nga Gunther Krichbaum.
Ai që ditët e fundit është vënë në qendër të një përplasjeje të re mes kryetarit të Partisë Demokratike, Lulzim Basha dhe Kryeministrit Rama.
Në fundjavë, Basha akuzonte kreun e Qeverisë se po financonte një fushatë denigruese me shënjestër kreun e Komisionit për Çështjet e Europës në Bundestag. Deklarata e Bashës shkaktoi reagimin e Kryeministrit përmes një postimi në Facebook.
Ja çfarë shkruante Rama:
“Gunther Krischbaum nuk është miku im dhe as nuk hyn ndër dashamirësit e Partisë Socialiste e të qeverisë sonë! Unë nuk jam aspak dakord me opinionin e tij për punën e qeverisë sime dhe këtë ai e di shumë mirë, sepse e ka dëgjuar nga unë, sy më sy dhe jo mbrapa krahëve. Por, zotëria në fjalë ka të gjithë respektin tim për ndihmën që dha kur zotrote bllokoje Reformën në Drejtësi dhe kurrën e kurrës, jo ai po asnjë i huaj i interesuar për Shqipërinë, nuk ka qenë e s’mund të jetë shënjestra e ndonjë sulmi të orkestruar prej meje apo prej Partisë Socialiste. Kurrë!”.
Këtë të mërkurë Rama dhe deputeti gjerman do të ballafaqojnë argumentet e tyre me njëri-tjetrin.
Rama drejt Berlinit për t’u përballur me Merkel dhe Krichbaum.
Ja kush është Gunther Krichbaum:
Ai mban poste shumë të rëndësishme në partinë e Kancelares, britanikët e quajnë “qen sulmi i Merkel”, etiketim që i ka mbetur nga koha e Brexit. Ai mban disa tituj dhe vlerësime, ndërsa në Shqipëri i janë bërë shumë akuza duke e quajtur antishqiptar, pasi deklaronte se nuk është koha për Shqipërinë dhe se kërkesa e Shqipërisë për hapjen e negociatave është e papjekur.
Akuzohej si proserb dhe për standarde të dyfishta me qëndrimin pro integrimit të Serbisë, edhe pse në atë vend nuk ka nisur një reformë në drejtësi, apo kur kërcënonte Kroacinë që të mos bëhej pengesë për Beogradin. Akuzohet edhe për qëndrime proruse duke arritur deri aty sa të thuhet se është në borderotë e Vladimir Putinit.
Priten përballje të rëndësishme në Bundestagun gjerman. Roli i kancelares Merkel dhe i social-demokratëvë gjermanë është vendimtar sa i takon dhënies së lejes për nisjen e bisedimeve për anëtarësimin e Shqipërisë në BE.
Për lajm-shqip:
Klajdi Thaçi
24.04.2018
