Qeveria shqiptare emetoi dje 15 milionë euro bono thesari me afat maturimi 12 muaj dhe me interes mesatar të ponderuar prej 5.26 përqindësh. Lajmi bëhet i ditur nga Ministria e Financave.
Interesi mesatar i ponderuar përdoret nga Banka e Shqipërisë për të llogaritur interesin që do t’u paguhet individëve që kanë kërkuar të blejnë bono thesari në euro pa marrë pjesë në tender. Kjo do të thotë se qytetarët që kanë aplikuar, mund të paraqiten më datë 24 gusht për të tërhequr bonot, si dhe interesin prej 5.26 përqindësh të shumës së depozituar.
Shumë qytetarë janë paraqitur gjatë muajit të fundit pranë zyrave të Bankës së Shqipërisë në sheshin “Avni Rustemi” për të aplikuar për blerje bonosh thesari në euro apo në lekë, duke përfituar interesa deri dy herë më të larta nga interesat që ofrohen nga bankat për depozitat me afat.
Bankat dhe operatorët e tjerë hodhën oferta të përgjithshme në ankandin e djeshëm prej afro 21 milionë eurosh, duke e mbuluar kërkesën në masën 140 për qind dhe duke e bërë këtë ankand të suksesshëm. Në ankandin paraardhës, ofertat për blerje bonosh qenë më të pakta se sa kërkesa e qeverisë. Interesimi i lartë solli edhe rënien e interesit mesatar në krahasim me ankandin paraardhës. Në ankandin e shkuar të zhvilluar më 24 korrik, interesi mesatar i ponderuar ishte 5.66 për qind.
Duke qenë se bonot e thesarit e japin interesin në fillim të periudhës, përfitimi real i qytetarëve është më i lartë se sa me depozitat, edhe sikur këto të fundit të kenë të njëjtin interes, pasi depozitat e paguajnë interesin në fund të periudhës. Bonot e thesarit janë veçanërisht me leverdi për këdo që ka kursime prej 5 apo 10 mijë eurosh, pasi bankat ofrojnë interesa prej 3 apo 4 përqindësh në vit ndërsa bonot i kanë interesat shumë më të larta.
Qeveria u detyrua t’u kërkojë qytetarëve blerjen e drejtpërdrejtë të bonove të thesarit, pasi një bankë uli ekspozimin ndaj rrezikut të borxhit sovran shqiptar, duke e vënë qeverinë në vështirësi. Qytetarët kanë shprehur interes të lartë për blerjen e borxhit publik.
22.08.2012
Burimi: Gazeta Shqip