Qeveria, ndryshim vendimi për kuotat e…

TIRANE – Këshilli i Ministrave vendosi që në çdo program studimi, në ciklin e parë të studimeve me kohë të plotë në vitin akademik 2012 – 2013, 3 (tre) studentët e vitit të parë, me rezultatet më të larta në plotësimin e kritereve të pranimit (pikët e fituara në sistemin meritë – preferencë), në programin e studimit përkatës, përjashtohen nga tarifa vjetore e shkollimit.
Në vendim saktësohet se “përjashtim bëjnë Universiteti i Arteve dhe Akademia e Arteve Shkodër, në të cilat 3 (tre) studentët e vitit të parë, me rezultatet më të larta në plotësimin e kritereve të pranimit (pikët e fituara në sistemin meritë – preferencë) në nivel fakulteti, nuk paguajnë tarifën vjetore të shkollimit”.
Gjithashtu, vendimi i qeverisë sqaron se shpërndarja e fituesve në programe të ndryshme studimi, të ofruara nga institucionet publike të arsimit të lartë, bëhet në mënyrë të informatizuar, duke u mbështetur në rezultatet e shkollës së mesme, të Maturës Shtetërore (merita), si dhe të përzgjedhjes së programeve të studimit (preferenca), të bërë nga vetë kandidati/ja.
Raundi i parë (aplikimi me formularin A2) zhvillohet në dy faza: regjistrimi on line dhe dorëzimi i dokumentacionit shtesë pranë institucioneve të arsimit të lartë publik ku janë shpallur fitues.Kuotat, që mbeten të parealizuara për çdo program studimi pas aplikimit me formularin A2, rishpërndahen nga Ministria e Arsimit dhe Shkencës, në bazë të propozimeve të institucioneve publike të arsimit të lartë.
Në raundin e dytë kanë të drejtë të marrin pjesë të gjithë maturantët/kandidatët që kanë konkurruar në raundin e parë më të njëjtën renditje preferencash të atij raundi.
Formularin A3 kanë të drejtë ta plotësojnë të gjithë kandidatët, të cilët kanë marrë pjesë dhe kanë rezultuar fitues në provimet e Maturës Shtetërore, sesioni i parë, por nuk kanë plotësuar formularin A2; kanë marrë pjesë dhe kanë rezultuar fitues në provimet e Maturës Shtetërore, në sesionin e vjeshtës 2012; kanë përfunduar shkollën e mesme jashtë Republikës së Shqipërisë dhe u janë ekuivalentuar rezultatet e shkollës së mesme dhe provimet e Maturës Shtetërore si dhe kanë plotësuar formularin A1Z në sesionin e dytë (të vjeshtës) dhe rezultojnë kalues në provimet me zgjedhje.
Kuotat, që mbeten të parealizuara edhe pas regjistrimit të fituesve të shpallur nga aplikimi në raundin e fundit, nuk rishpallen.”.
Gjatë mbledhjes së sotme, qeveria mori vendim edhe për kuotat financiare të ushqimit në mensa e konvikte, bursat e shtetit dhe pagesat e nxënësve e të studentëve në institucionet arsimore publike, për vitin shkollor 2012 – 2013.
“Nxënës të klasës së 13-të të shkollave profesionale, drejtimi termohidraulikë, që nuk kanë përfituar bursë me vendim të këshillave të njësive të qeverisjes vendore, për periudhën e zhvillimit të praktikës profesionale, mbështetur në kërkesën e Drejtorisë Arsimore Rajonale u akordohet/miratohet bursë nga ministri i Arsimit dhe Shkencës”, thuhet në vendimin e publikuar në faqen e Këshillit të Ministrave.
Më tej saktësohet që “Ministria e Arsimit dhe Shkencës, për periudhën e zhvillimit të praktikës profesionale për nxënësit e klasës së 13-të, të shkollave profesionale, drejtimi termohidraulikë, për vitin e ri akademik 2012 – 2013, të japë 456 (katërqind e pesëdhjetë e gjashtë) muaj bursë”.
25.10.2012
Burimi: Balkanweb