Protestat në Turqi, mbi 900 persona të arrestuar
Policia turke ka arrestuar më shumë se 900 persona gjatë dy ditëve të protestave anti-qeveritare në Stamboll. Ministri i Brendshëm Muammer Guler ka njoftuar se disa prej këtyre personave janë lënë sërish të lirë, ndërsa të tjerë do të përballen me gjykatën.
Guler shtoi se gjatë protestave janë plagosur 26 oficerë policie dhe 53 civilë, njëri prej të cilëve ka marrë plagë të rënda.
Protestat e egra në Turqi shpërthyen pasi policia ndërhyri në një protestë paqësore kundër një plani për rindërtimin e një parku në Stamboll.
Sipas BBC, kryeministri Erdogan i ka ofruar uljen në bisedime protestuesve, por nuk ka një udhëheqës të qartë të tyre.
Policia përdori gaz lotsjellës dhe ujë me presion në përpjekje për të shpërndarë një tubim paqësor të premten në sheshin e famshëm Taksim të Stambollit, që ka qenë prej kohësh qendër e protestave politike. Por reagimi i ashpër vetëm sa provokoi trazira të mëtejshme, duke kthyer blloqe të tëra të lagjes qendrore në atë që i ngjason një zone lufte me dhjetra të plagosur.
Në solidaritet me demonstruesit në Stamboll, protesta shpërthyen në Ankara dhe në më shumë se 12 qytete turke kur protestuesit janë përleshur me policinë dhe kanë hedhur parrulla kundër kryeministrit Recep Tayyip Erdogan.
Në mëngjesin e së dielës, situata në rrugët e Stambollit ka qenë e qetë.
02.06.2013
Burimi: Top-Channel
