BRUKSEL – Një ditë përpara publikimit të progres-raportit të KE-së, agjencia italiane e lajmeve ‘Ansa’ shkruan se Shqipëria do të bëhet të mërkurën vendi më i ri kandidat për t’u anëtarësuar në Bashkimin Europian.
Duke iu referuar burimeve brenda Komisionit Europian, ‘Ansa’ nënvizon se KE do t’i japë Shqipërisë dritën jeshile, për të marrë statusin kandidat, por duke vendosur disa kushte shtesë. Kjo nënkupton se ‘po’-ja e Brukselit për Shqipërinë do të jetë e kushtëzuar me progresin e reformave në vend.
Rëndësi të veçantë do të ketë përgatitja, organizimi dhe përfundimi me sukses i procesit zgjedhor jo vetëm për shkak të parregullsive të vërejtura vitet e mëparshme, por edhe sepse prek drejtpërdrejtë një sërë prioritetesh të tjera si: Dialogu politik, funksionimi dhe pavarësia e sistemit gjyqësor, profesionalizmi i administratës publike, etj.
Suksesi në realizimin e zgjedhjeve, së bashku me ecjen përpara të reformave që ndihmojnë funksionimin dhe ruajtjen e pavarësisë së institucioneve, do të ishte konfirmim i pjekurisë politike dhe institucionale të arritur nga Shqipëria dhe arritje e merituar e statusit te vendit kandidat për anëtarësim në BE.
Pak ditë më parë, “Ansa”, zbuloi një pjesë të raportit, ende të papërfunduar të Komisionit Europian, që pritet të publikohet më 10 tetor, në kuadër të politikave zgjeruese të BE-së.
Sipas raportit të Komisionit Europian, dialogu mes qeverisë dhe opozitës shqiptare bëri të mundur kapërcimin e krizës dhe miratimin në kohë të reformave kyçe, si kodi zgjedhor apo reforma parlamentare, në mënyrë që vendi të ecë përpara në rrugën drejt BE-së. Sipas dokumentit, Tirana zyrtare ka bërë një punë të mirë, për sa i përket përmbushjes së rekomandimeve të BE-së për marrjen e statusit kandidat.
Që prej vitit 2009, janë hedhur poshtë kërkesat e Shqipërisë për tu bërë zyrtarisht vend kandidat për anëtarësim në BE, por duket se këtë vit vendi ynë do të arrijë të kalojë provimin e Brukselit, duke marrë një opinion pozitiv më 10 tetor. Më pas rekomandimi i KE-së shkon në tryezën e Këshillit të BE-së, në muajin dhjetor, ku vendet anëtare duhet të marrin një vendim përfundimtar.
Nëse i jepet drita jeshile, Shqipëria do të bëhet kështu vendi i pestë i Ballkanit, kandidat për të hyrë në BE, pas Kroacisë që do të anëtarësohet në 2013-ën, Maqedonisë, Malit të Zi dhe Serbisë. Këtyre vendeve u shtohen edhe vende të tjera kandidate, si Turqia dhe Islanda, ndërsa Bosnje Hercegovina dhe Kosova janë ende në pritje.
09.10.2012
Burimi: Balkanweb
Pritet raporti i KE, Ansa: Status i kushtëzuar për Shqipërinë
