Pragmatist,pasi ka kapërcyer mallkimin dhe tersin e fillim sezonit, skuadra e Partizanit nuk njehmë pengesa. Të kuqtë pragmatistë, me pak raste dhe pa lojë spektakolare, kanë fituar minimalisht 0-1, në transfertë ndaj Vllaznisë, për të regjistruar kështu fitoren e tretë rradhazi. Ka qenë një gol i Basrak që në minutën e 4’ të lojës ai që ka vendosur fatin e takimit, duke ngjitur të kuqtë, të paktën provizorisht në vend të tretë me 11 pikë, në pritje të përballjes direkte Flamurtari-Kamza, ndërkohë që ka thelluar më shumë krizën e shkodranëve. Kuqeblutë numërojnë vetëm një fitore në 7 javë, ndërkohë që sot përballë Partizanit koleksionuan humbjen e katërt.
Partizani e ka nisur këtë takim menjëherë në avantazh, falë golit të shpejtë të realizuar nga Basrak. Ky i fundit ka gjetur rrugën drejt rrjetës në minutën e 4’, pasi ka shtyrë me kokë për në portë një top të krosuar nga Trashi. Një gol që ka vendosur fatin e takimit, pasi mes lojës pa shumë raste, i vetmi për tu përmendur më pas ishte ai me Gilman Likën protagonist. Veterani i shkodranëve ka vënë në provë portierin e Partizanit, Alban Hoxha, në minutën e 64’ kur ka goditur fuqishëm dhe saktë nga jashtë zone, por topi qëndror dhe aftësitë e gardianit të të kuqve, kanë bërë që rreziku të neutralizohet në dy kohë. Të kota kanë rezultuar përpjekjet e shkodranëve në minutat e mbetura, pasi ka munguar rrezikshmëria dhe saktësia e tentativave, ndërkohë që të kuqtë arritën misionin e tyre, të mbronin epërsinë e vendosur që në fillim të takimit.
Vllaznia-Partizani 0-1
Shënues: Basrak 4’
Vllaznia: Selimaj, Gocaj, Pjeshka, Orelesi, Marku, Krymi, Tafili, Hasani, Çinari, Lika, Kalaja.
Trajner: Ernest Gjoka
Partizani: Hoxha, Progni, Ibrahimi, Malota, Kalari, Vila, La Camera, Batha, Trashi, Adorjan, Basrak.
Trajner: Mark Juliano
Gjyqtarë: Eldorjan Hamiti
22/10/2017
