Policia sekuestron 39 kilogram Cannabis Sativa në Vlorë e Sarandë, arrestohen 6 persona, 1 në kërkim.
Policia e Vlorës ka ushtruar kontrolle ndaj disa shtetasve në banesat e tyre. Ajo ka patur informacion se ushtronin aktivitetin kriminal të prodhimit dhe shitjes së lëndëve narkotike.
Kjo bëhet në vijim të punës së saj për parandalimin, evidentimin dhe goditjen e rasteve të veprimtarive të ndryshme kriminale. Gjithashtu, operacioni bëhet edhe në kuadër të vënies përpara përgjegjësisë ligjore të autorëve të tyre.
Dje specialistët e Seksionit kundër narkotikëve në Drejtorinë Vendore të Policisë Vlorë, kanë arrestuar në flagrancë shtetasin:
- Erjon Danaj, 33 vjeç, banues në Kotë.
Gjatë kontrollit të ushtruar në banesë i janë gjetur dhe 2 thasë sintetikë, të dyshuar me lëndë narkotike Cannabis. Në total ishin 9,7 kg.
Në Sarandë, specialistët e Seksionit kundër trafiqeve dhe narkotikëve arrestuan në flagrancë shtetasit e mëposhtëm.
- Mustafa Idrisllari, 56 vjeç, banues në Vrinë. Në banesë i janë gjetur dhe sekuestruar 22 kg Cannabis Sativa. Ai ka kundërshtuar me dhunë punonjësit e Policisë gjatë kontrollit në banesë.
- Feti Idrisllari, 59 vjeç, banues në Vrinë, (ka kundërshtuar punonjësit e policisë).
- Asllan Pashaj, 57 vjeç, banues në Vrinë. Gjatë kontrollit të ushtruar i janë sekuestruar 3,7 kg lëndë narkotike Cannabis Sativa, si edhe ka kundërshtuar punonjësit e Policisë.
- Fiqirije Pashaj, 54 vjeçe, banuese në Vrinë. Ajo kundërshtoi punonjësit e policisë, si edhe ka favorizuar shtetasin e shoqëruar të largohet prej mjetit të policisë.
- Kosta Pashaj, 26 vjeç, banues në Vrinë. Gjatë kontrollit në banesë i janë gjetur e sekuestruar 3,4 kg lëndë narkotike Cannabis Sativa. Dyshohet se i ka marrë me dhunë 30 000 mijë lekë shtetasit F.M.
Policia Sarandë ka shpallur në kërkim shtetasin E.I., 26 vjeç.
Në banesën e këtij të fundit, ku jeton me babain, shtetasin Mustafa Idrisllari, policia sekuestron 22 kg lëndë narkotike.
Ai po ashtu në bashkëpunim me shtetasin Kosta Pashaj i kanë marrë me dhunë 30 000 lekë shtetasit F.M. Shtetasi E.I u shoqërua nga policia, por është larguar i prangosur nga mjeti i policisë, me ndihmën e disa banorëve.
Policia e Vlorës dhe Sarandës po vijojnë punën intesivisht për kapjen dhe ndalimin e shtetasit të shpallur në kërkim.
Drejtoria e Standardeve Profesionale dhe Shërbimi për Çështjet e Brendshme dhe Ankesat kanë nisur verifikimet për punonjësit e policisë. Kjo pasi me veprimet apo mosveprimet e tyre kanë sjellë pasojë, largimin e 26 vjeçarit.
Për Lajm-Shqip
E.M
06.11.2017
