Policia dhe prokuroria e Gjirokastrës janë vënë në lëvizje për të hetuar skandalin e ndërtimeve abuzive në Gjirokastër.
Hapja e hetimeve erdhi pas ngjarjeve të njëpasnjëshme, përmbytjeve, rrëshqitjeve të dherave dhe rrënimeve në banesa private dhe publike
Situata më e fundit e krijuar më shembjen e një rruge të asfaltuar në lagjen “Kodra e Shtufit e cila rrëshqi sipër një pallati 8 katësh.
Ndërkohë që janë në rrezik 3 vila private sipër segmentit të rrugës së shembur.
Burime të rezervuara thanë se hetimi përfshin dosjen e plotë të lejeve të ndërtimit në zonat e rrezikuara dhe dëmtuara.
Sot pritet merrja në pyetje e ekspertëve dhe përfaqësuesve të kompanive që kanë fituar tenderat dhe kanë ndërtuar objektet.
“Dyshohet se abuzimet fillojnë me lejet e ndërtimit, vazhdojnë me respektimin e projekteve deri me parametrat e sigurisë” nënvizon burimi.
Pallati i mbuluar nga dherat është ndërtuar rreth 10 vjet më parë.
Aktualisht aty banojnë 24 familje momentalisht të evakuuara nga bashkia.
Por ka edhe prej tyre të strehuar kryesisht tek të afërmit ose në banesa me qera.
Mirëpo frika dhe paniku ka përfshirë një zonë me të gjërë se pallati i mbuluar dhe 3 vilat e rrezikuara.
Dëmtimet në “Kodrën e Shtufit” janë vetëm një pjesë e tyre , ndërsa shkaku i situatës nuk është vetëm natyror.
Policia dhe prokuroria hetim për skandalin e ndërtimeve në Gjirok
Dëme dhe rreziqe të njëjta ka edhe në lagjet Puntori, Cfakë, Manalat, Granicë.
Natyrisht që kjo i ngjan një katastrofe me përmasave natyrore, por edhe me përgjegjësitë njerëzore.
Situata zbulon plotësisht skandale që janë bërë në Gjirokastër me lejet e ndërtimit jashtë normave dhe kritereve ligjore.
Ndërtimet e reja jashtë zonës historike janë simboli i abuzimit me ligjet e natyrës duke zaptuar me ndërtime çdo pëllëmbë toke.
Në këto zona është ndërtuar “me leje” por duke shpërfillur studimet gjeologjike dhe kriteret e përcaktuar nga ligjet urbanistike.
“Bumi” i ndërtimeve të pas 1990-s është katastrofik dhe në rrethana të rreshjeve “hilet” e ish-kryebashkiakëve të mëparshën zbulohen lehtësisht.
Ekspertët e Bashkisë dhe gjeologët nga Tirana kanë vlerësuar gjendjen tepër të rrezikshme.
Mbi këtë bazë kryetarja e bashkisë Zamira Rami ka kërkuar dhe rekomanduar nga qeveria shpalljen e “gjendjes së emergjencës”.
Mirëpo propozimi i Ramit për shpalljes së “gjëndjes emergjente”, ka ndeshur në kundërshmin e të dërguarit të qeverisë Petro Koçi.
Në një mbledhje të shtabit të emergjencave ai tha se nuk egzistojnë elementët që të kalohet në këtë nivel angazhimi.
“Situata është në kontroll, angazhimi maksimal, por nga pikpamja ligjore me propozim nuk bëhet nga strukturat vendore”, kundërshtoi Koçi.
Pritet që hetimet e ndërmarra së fundmi të japin një përgjigje përfundimtare pse ndodhin përmbytjet dhe cilët janë personat përgjegjës.
Engjëll Serjani
05.02.2018
