Po ndodh çdo ditë, prindër që vriten nga evlati…
Vjen një moment në jetë ku të gjithë njerëzit të bëhen ish, ish-gruaja, ish-burri, ish-miku e ish-fqinji. Vetëm nëna, babai e fëmija nuk bëhen kurrë ISH.
Si mundet një fëmijë të vërë dorë mbi prindin apo më keq akoma t’i marrë jetën?!
Si mundet të vrasë nënën, atë që i dha jetën, e bëri natën ditë e ditën natë për të?
Si mundet të vrasë babain që luftoi për më të mirën ?!
Këto ditë u trondit Korça, u mbyt një nënë nga fëmija i saj. E rriti, e ushqeu me qumësht gjiri dhe ai i mori jetën. Dëshmi tronditëse shoqërojnë historinë, ishte i dehur, e rrihte çdo ditë.
Po pse vallë? Çfaj kishte?
Një tjetër histori tragjike njeh edhe Peshkopia. Djali që u kthye nga Anglia nuk u çmall me nënën e babain por u mori jetën, i vrau.
Edhe qyteti bregdetar i Durrësit i tronditur mban mbi supe të tilla histori rrënqethëse. Një djalë ka vrarë babain dhe nënën e tij në Xhafzotaj. Zëra thonë se djali i cili kreu aktin e tmerrshëm është me probleme mendore.
Një tjetër ngjarje tragjike ka prekur edhe qytetin e Elbasanit ku djali mbyti nënën e tij. Ai ka çuditur policinë me deklaratën. Zenel Hoxha, i pyetur nga ekspertët e krimit në familje ka përsëritur shpesh të njëjtat fjalë: Dëgjoja zhurma! Kur e pyetën se çfarë zhurmash dëgjonte, ai u përgjigj: “Nëna bënte zhurmë”. I riu, pasi ka dëgjuar zhurma, ka hyrë në dhomën e nënës, dhe i ka vendosur duart në fyt duke e mbytur atë.
E sa e sa raste të tjera kanë ndodhur emëruesi mbetet i përbashkët, lekët për të pirë alkool ose lëndë narkotike.
Një pjesë prej tyre nuk gjykohen, thuhet se kanë probleme mendore. Nje pjesë tjetër janë adoleshentë. Thuhet së kryejnë kësoj aktesh për shkak të moshës delikate.
Zemrat e prindërve janë humnerë e thellë, në fund të së cilës gjithmonë do të gjesh falje. Po ju, do të gjeni vallë ?!
Erjona Keta
05.03.2019
