Përse mungoi djali i madh i Aleksandër Ndokës në varrimin e të atit
Përse mungoi djali i madh në varrim
Vrasja e Aleksandër Ndokës në Lezhë në një atentat me 14 plumba tronditi jo pak qytetin dhe familjarët e tij.
Kjo edhe për shkak të popullaritetit të fisit Ndoka në zonë.
Duke përmendur këtu edhe faktin që Aleksandri ishte vëllai i ish-deputetit Arben Ndoka.
Djali i vogël i Aleksandër Ndokës, gjatë ceremonisë së varrimit, mbahej i shoqëruar nga dy furgonë me policë, të cilët qëndronin në gatishmëri nga distanca.
Përveç 19-vjeçarit Samuel Ndoka, të pranishëm në ceremoni ka qenë dhe vajza e tij e madhe, Jorida.
Ndërsa ka munguar djali tjetër, Klajdi, për shkak se është person i shpallur në kërkim nga policia.
Ai akuzohet se ka dhunuar Nënkryetarin e Qarkut të Lezhës, ngjarje e ndodhur në shkurt të këtij viti.
Krahas qytetarëve të thjeshtë, homazhe në familjen Ndoka bënë edhe politikanë të shumtë lokalë dhe qendrorë.
Për shkak të këtij fluksi, rrugët drejt vendit ku po kryheshin ceremonitë mortore u mbushën nga automjete të shumta.
Edhe nga larg vihej re prania e shumë të pranishmëve të mbledhur për të nderuar 48-vjeçarin e vrarë, Aleksandër Ndoka.
Nuk ka munguar edhe Policia e Shtetit, kryesisht për të monitoruar trafikun që krijohej shpeshherë në rrugët që lidhnin daljet kryesore me vendin ku po kryhej ceremonia mortore.
Varrimi i Ndokës u bë rreth orës 13:30 të së dielës, në varrezat e lagjes ku jeton familja Ndoka, në Lezhë.
11.12.2017
