Përmet /Bashkia e parë që shpërndan grante për OJF.
Bashkia e Përmetit është e para që ndan grante për inkurajimin e mjedisit ligjor dhe financiar inkurajues për shoqërinë civile si dhe për mbështetjen e OJF-ve.
Bashkia Përmet është një ndër 12 bashkitë fituese e një programi integrues të financuar nga BE dhe e menaxhuar nga UNDP.
Programi përmban një skemë për dhënie grantesh për mbështetjen e OJF-ve që ofrojnë shërbime në përputhje me prioritetet e bashkisë.
Kryetari i bashkisë Përmet, Niko Shupuli sqaron se zhvillimi i demokracisë vendore përballet me sfidën e bashkëpunimin mes faktorëve.
“Programi synon partneritet me pushtetin lokal dhe organizatat e shoqërisë civile (OSHC) dhe nxitjen e transparencës. Aktualisht elementët e shoqërisë civile nuk janë funksional e të besueshëm. Me këtë program ne inkurajojmë partneritetin me OSHC”, nënvizon kryetari i bashkisë Përmet.
Programi Rajonal mbi Demokracinë Vendore në Ballkanin Perëndimor (ReLOaD) bën pjesë në procesin e integrimit në BE.
Fuqizimit të shoqërisë civile, vazhdon Shupuli bëhët real me pjesëmarrjen e saj aktive në vendimmarrje.
Bashkia në bashkëpunim me UNDP ka shpallur thirrjen e parë për OSHC lokale dhe brenda dy vjetëve do të shpallë tre thirrje publike.
Dy të parat do të financohen nga shuma e alokuar të grantit me bashkëfinancim të fondeve të UNDP dhe bashkisë.
Ndërsa thirrja e fundit do të financohet nga fondet e vetë Bashkisë. Fitojnë aplikantët projektet e të cilëve janë në përputhje me prioritetet e vendosura nga bashkia sipas planeve strategjike.
UNDP do të nënshkruajë marrëveshje financimi me secilën prej organizatave të përzgjedhura, thirrja e tretë do të ketë marrëveshje të nënshkruar ndërmjet bashkisë dhe organizatave të shoqërisë civile.
Për Lajm-shqip
Engjëll Serjani
