Peqin, vjedh të moshuarin për të blerë drogë, arrestohet 17-vjeçari
Peqin, vjedh të moshuarin për të blerë drogë
Ndodh shpesh që, përdoruesit e drogës të kryejnë edhe akte vjedhje, vetëm e vetëm për të blerë lëndën narkotike.
Kështu ka ndodhur me një 17-vjeçar në qytetin e Peqinit.
Sipas burimeve zyrtare të policisë, specialistët e Seksionit për Hetimin e Narkotikëve, në bashkëpunim me efektivët e Komisariatit të Policisë Peqin, bënë arrestimin në flagrancë të K.Sh., 17 vjeç, banues në Peqin.
I njëjti burim konfirmon se arrestimi i tij, u bë, pasi në Peqin, pranë Postës, dyshohet t’i ketë vjedhur 20000 lekë të reja qytetarit, I.K., 73 vjeç banues në fshatin, Blinas, Peqin.
I gjendet lëndë narkotike
Gjatë kontrollit fizik, shtetasit të lartpërmendur i është gjetur 13 gram lëndë narkotike, e dyshuar si “Cannabis Sativa” (në formë çokollate) dhe 10500 lekë (të reja), që i janë sekuestruar në cilësinë e provës materiale.
Ndërkohë, po punohet për kapjen e të miturit, S.K., 15 vjeç banues në këtë qytet.
Nga veprimet e para hetimore, rezulton se është personi i dyshuar, që i ka shitur lëndën narkotike shtetasit, K.Sh.
Materialet i kaluan Prokurorisë Pranë Rrethit Gjyqësor Elbasan, për veprime të mëtejshme, për veprën penale “Prodhim dhe shitje e narkotikëve”, si dhe “Vjedhje”, në ngarkim të shtetasit K.Sh dhe për veprën penale “Prodhimi dhe shitja e narkotikëve” në ngarkim të shtetasit S.K.
Për Lajm Shqip
Alfrida Danushi
