TIRANË- Një grup deputetësh të Partisë Demokratike kërkuan të premten heqjen e mandatit të deputetit të Partisë Socialiste, Fidel Ylli. Deputetët e PD-së i kërkuan Kuvendit që të dërgojë në Gjykatën Kushtetuese këtë çështje, që ata e konsiderojnë si shkelje flagrante të nenit 70 të Kushtetutës nga ana e deputetit Ylli.
Në kërkesën e tyre thuhet se deputeti socialist ka rezultuar të jetë ortaku i vetëm i një radioje, në dhjetor të vitit 2009, ndërkohë që ai ishte shpallur deputet, me vendim të KQZ-së, që në gusht të këtij viti. Siç dihet, dhe siç përcakton ligji, frekuencat e radiove dhe televizioneve janë pasuri publike.
“Kushtetuta thotë se deputetët nuk mund të kryejnë asnjë veprimtari fitimprurëse, që buron nga pasuria e shtetit ose e pushtetit vendor dhe as të fitojnë pasuri të këtyre. Pas katër muajve, në shkelje të hapur me Kushtetutën dhe ligjet e vendit, zoti Ylli rezulton të ketë bërë një shitje fiktive të radios, duke e kaluar atë në pronësi të së motrës, në fund të dhjetorit 2009”,- thuhet në kërkesën e deputetëve demokratë.
Sipas deputetëve të PD-së, rasti i deputetit Fidel Ylli është i ngjashëm me atë të ish-kolegut të tij, Ilir Beqja.
“Zoti Beqja e humbi mandatin e deputetit, rreth dy vjet më parë, pasi Kuvendi çoi në Gjykatën Kushtetuese fakte, që provonin se ai kishte përfituar fonde nga pushteti vendor, gjatë ushtrimit të mandatit të deputetit. Gjykata Kushtetuese e çmoi të drejtë kërkesën e Kuvendit, i cili u vu në lëvizje sërish nga një grup deputetësh të Partisë Demokratike”, thuhet më tej në kërkesën e deputetëve të PD-së.
Ndërkohë nga ana e tij, deputeti Fidel Ylli deklaroi për “Neës24” se nuk ka patur asnjë konflikt interesi dhe në asnjë moment nuk e ka shkelur ligjin. Sipas Yllit, “kjo është një luftë politike dhe qeveria përmes akuzave të pabaza kërkon të tërheqë vëmendjen nga problemet reale.”
“ILDKP dhe gjykata kanë konfirmuar se që nuk ka patur konflikt interesi. Unë nuk kam qenë administrator por pronar i radios.”- u shpreh deputeti socialist.
25.01.2013
Burimi: Balkanweb
