Përplasjet
Ndërkombëtarët ndërhynë në zgjidhjen e krizës për rikompozimin e Komisionit Qendror të Zgjedhjeve. Në ditën e djeshme ishte paralajmëruar mbledhja e Komisionit Parlamentar të Ligjeve për çështjen e 18 kandidatëve për kreun e Komisionit Qendror të Zgjedhjeve. Kryekomisioneri Ilir Rusmali kishte paralajmëruar një takim për çështjen e KQZ-së, përpara se socialistët të linin mbledhjen, për shkak se nuk do të pranonin asnjë votim ligji me shumicë të cilësuar të votave, pa u zgjidhur më parë çështja e Fierit. Kur të gjithë prisnin shqyrtimin e kandidaturave për kreun e KQZ-së, në ambientet e Kuvendit është parë zv.ambasadori i OSBE-së, Dan Redford. Në korridorin ku ndodhet zyra e Komisionit të Ligjeve, Redford ka biseduar për më shumë se 10 minuta me kryekomisionierin Ilir Rusmali. Kjo bisedë është zhvilluar në prani edhe të dy deputetëve Viktor Gumi dhe Fatos Hoxha. “Ata nuk po vijnë të realizojnë procedurën për zgjedhjen e kreut të KQZ-së”, mësohet t’i ketë thënë Rusmali, zv.ambasadorit të OSBE-së. Rusmali më pas të tërë energjinë e tij e ka shkarkuar kundër opozitës, duke e akuzuar për moszbatim të afateve kohore të parashikuara në Kodin Zgjedhor. Porse mësohet se Redford i kërkoi Rusmalit që kjo çështje të zgjidhet sa më parë. Si PD-ja, ashtu edhe PS-ja shprehen se kanë qenë në pritje të zhvillimit të mbledhjes së komisionit, duke ia hedhur fajin njëra-tjetrës.
Reagimi i PS-së
Pas dështimit të mbledhjes, nga selia e PS-së, sekretari për çështjet zgjedhore ka mbajtur një qëndrim zyrtar të opozitës. Ai denoncoi atë që e cilësoi si skenar antiligjor të mazhorancës për të uzurpuar KQZ-në. “Mazhoranca qeverisëse po e fillon zbatimin e Kodit Zgjedhor me shkelje dhe njëanshmëri. Sipas një skenari të parapërgatitur dhe që filloi javën që shkoi në Kuvend, mazhoranca po shkel me dashje dhe pa asnjë justifikim ligjin zgjedhor për zgjedhjen e kryetarit të KQZ-së. Ndërkohë, pa asnjë justifikim ligjor nuk votoi në seancën që shkoi kandidatët për anëtarë të KQZ-së, megjithëse procesi i përzgjedhjes së tyre kishte përfunduar me konsensus. Kodi Zgjedhor përcakton qartë që zgjedhja e kryetarit të KQZ-së bëhet pas përfundimit të zgjedhjes së anëtarëve të KQZ-së”, tha Gjiknuri. Sipas tij, Kodi Zgjedhor përcakton qartë që kandidatët për kryetar të KQZ-së shqyrtohen nga Kuvendi në përputhje me rregulloren e Kuvendit, e cila mandaton qartë Komisionin e Ligjeve për t’u njohur me kandidatët dhe për t’i thërritur ata në seancë dëgjimore. “Të gjithë partnerët ndërkombëtarë po kërkojnë me zë të qartë që procesi i përzgjedhjes së kryetarit të KQZ-së të jetë transparent dhe gjithëpërfshirës. Instrumentet ligjore janë në dispozicion dhe ligji i ka përcaktuar qartë. Nevojitet vetëm vullnet politik nga ana e mazhorancës”, theksoi Gjiknuri.
Qëndrimi i Berishës
Pas qëndrimit të PS-së, nëpërmjet kreut të PD-së, Sali Berisha, erdhi edhe reagimi i mazhorancës. “Sot, opozita kërkon ‘hearing’ (seancë dëgjimore) për kandidaturat, për kryetar të KQZ-së. Një e drejtë e plotë e tyre, por jo me dy standarde. Ata kërkojnë ‘hearing’ për kryetar të KQZ-së dhe nuk pranojnë ‘hearing’ për kandidaturat për anëtarë të komisionit. A ka më absurde! Nëse do që të ushtrosh të drejtën e dëgjimit, nuk mund t’ia mohosh palës tjetër ta ushtrojë edhe ajo, këtë të drejtë. Nxjerr Tahirin dhe thotë se Berisha nuk po respekton, por çfarë?! Këta e konsiderojnë shumicën si etërit e tyre, kulakët. Si mund të kërkosh ‘hearing’ për katër vetë dhe jo për të gjithë?! Parlamenti ka të drejtën e dëgjimit, por ata e refuzojnë këtë për të tjerët dhe e kërkojnë vetëm për këta të katërt. Se këta janë të deklasuarit, sipas tyre. Tani sërish do të kërkojë pazare”, tha Berisha. Më tej, Kryeministri theksoi se “dy standarde janë fyese! Ne nuk imponojmë dy standarde. Besojmë se zoti Rama do të përcaktohet për një standard. Nëse do t’i kalojë kandidaturat me ‘hearing’, në rregull, t’i kalojë. Nëse do t’i kalojë pa ‘hearing’, le t’i kalojë. Ai ka zëvendësuar çdo sens ligjor, me pazaret. Ligji është kontrata, i cili bashkon të gjitha palët. Por zoti Rama merr mendjen e njerëzve, të cilët u futën në universitet dhe ngelën në vit të parë, katër vjet rresht”.
Redford – Zv.ambasadori i OSBE-së, Dan Redford, ka qenë dje në selinë e Kryesisë së Kuvendit. Ai është takuar me kryekomisionerin Rusmali. Biseda mes tyre u fokusua te ngërçi i KQZ-së
18 konkurrentë – Për kreun e KQZ-së kanë depozituar emrat 18 konkurrentë, drejtues të institucioneve të ndryshme shtetërore
4 emra – PD-ja, nga 18 emrat, ka përzgjedhur 4 kandidatë të saj për kreun e KQZ-së: Lleshi, Mustafaj, Reka dhe Xhaferllari
OSBE-ja kërkon zgjidhjen e ngërçit të rikompozimit të KQZ-së, PS-PD akuzojnë njëra-tjetrën. Zv.ambasadori i OSBE-së, takim me Rusmalin
02.10.2012
Burimi: Gazeta Shqip
