Vettingu i partive është kauza më kryesore që duhet bërë para drejtësisë.
Ka patur gjithmonë një pyetje në Shqipëri. Përse ne kemi institucionet më të korruptuara në Europë, përse korrupsioni është një fenomen kaq brutal dhe kaq flagrant në Shqipëri?
A jemi ne një rracë njerëzore ndryshe nga të tjerët? Padyshim që jo.
Të ngjashme mund të lexoni:
Para drejtësisë, duhet bërë vettingu i partive
Korrupsioni ekziston në çdo shoqëri, në çdo sistem, e çdo regjim.
Në Shqipëri ai është shumë më flagrant, për një arsye shumë të thjeshtë dhe shumë madhore njëkohësisht.
Ne kemi të korruptuar deri në palcë sistemin politik. Dhe ka qenë ky sistem që ka prodhuar të gjitha hallkat e pushtetit, përfshirë edhe atë të drejtësisë.
Për pasojë korrupsioni është përhapur si virus e tashmë ka infektuar të tërë trupin e shoqërisë.
Politika është e korruptuar për shkak se ajo ushqehet nga paratë e sipërmarrjes së ndershme, sipërmarrjes së korruptuar dhe sipërmarrjes kriminale.
Partitë nuk deklarojnë se ku i gjejnë paratë që mbahen në këmbë dhe ushqejnë makinerinë gjigande në fushata elektorale.
Në këtë drejtim ato janë ndërmarrjet më informale në Shqipëri.
Ato qarkullojnë në të zezë miliona Euro, ndërsa një biznes i vogël mund të ndëshkohet rëndë edhe për një faturë me vlerën 10 Euro të fshehur.
Mekanizmi është shumë i pastër.
Bizneset financojnë partitë dhe më pas i marrin mbrapsht paratë duke u toleruar në tendera e koncesione, duke bërë invazion fiskal, duke bërë kontrabandë.
Shkalla e lartë e korrupsionit që ka pushtuar sot çdo qelizë të këtij shteti prodhohet pikërisht nga kjo kastë njerëzish.
Ata që pasurohen në kurriz të shtetit dhe me këto para ushqejnë edhe politikën.
Çështja e financimit të partive u shtrua sërish sot në një tryezë diskutimi, e mbështetur nga Këshilli i Europës.
Ekspertët e huaj sygjeruan, që partitë të mos gënjejnë në raportimet financiare, ato ti marrin paratë e buxhetit pasi kanë zhvilluar fushatën.
Por më shumë se kaq, ata sygjeruan që të ketë një çmim reference për aktivitetet elektorale, mbi bazën e të cilave t’u llogariten kostot e fushatës në tërësi.
Eshtë pikërisht kjo që duhet bërë.
Në zgjedhjet e vitit 2009, dy organizata joqeveritare bënë pikërisht këtë gjë.
Monitoruan aktivitetet e partive dhe nxorrën kostot e përafërta.
Dhe ato tregonin shpenzime nga 10 deri në 15 herë më të larta nga sa deklaruan vetë partitë.
Ky monitorim nuk u mor në konsideratë nga asnjë institucion. Sepse asnjë nuk dëshiron të ngatërrohet me paratë që furnizojnë politikën.
Pra mekanizmi mund të gjendet.
Pas një monitorimi të tillë, partitë duhet të vihen përballë detyrimit për të treguar se ku i gjetën paratë.
Pikërisht atë që po u bëhet sot njerëzve të drejtësisë nga Vettingu.
Kush nuk justifikon pronën që ka, është i korruptuar dhe ikën. Kjo duhet bërë edhe me partitë.
Vetëm në këtë mënyrë politika do të shkëputet nga korrupsioni dhe inkriminimi masiv.
Korrupsioni buron pikërisht tek partitë, në qeverisje apo opozitë.
Nëse ai nuk luftohet atje, do të jetë e kotë të synohet në hallka të tjera. Sepse këtu është qelbur burimi i ujit.
Për Lajm-Shqip
Mentor Kikia
